Ailə, Qadın və Uşaq Problemləri üzrə Dövlət Komitəsinin (AQUPDK) sədri Bahar Muradovanın dəvəti ilə Azərbaycanda səfərdə olan Türkiyə Respublikasının ailə və sosial xidmətlər naziri Derya Yanıkın rəhbərlik etdiyi nümayəndə heyəti ilə iyulun 19-da görüş keçirilib.

AZƏRTAC xəbər verir ki, görüşdə komitə sədri Bahar Muradova qonaqları salamlayaraq, ölkələrimiz arasındakı əlaqələrin möhkəm tarixi əsaslara söykəndiyini bildirib. Qeyd edib ki, dövlətlərarası münasibətlər təkcə Azərbaycanın və Türkiyənin deyil, eyni zamanda, regionun maraqlarına uyğun fəaliyyət göstərməyə şərait yaradır.

Bahar Muradova bu günədək ölkələrimiz arasında müxtəlif sahələr üzrə münasibətlərin qurulduğunu və bundan sonra da bu işin uğurla davam etdiriləcəyini vurğulayıb. Həmçinin 44 günlük Vətən müharibəsindən danışan komitə sədri hər zaman olduğu kimi, Azərbaycanın haqq mübarizəsində də Türkiyənin ölkəmizə göstərdiyi siyasi dəstəyin əhəmiyyətini vurğulayıb. O, Azərbaycanın işğaldan azad olunmuş torpaqlarında bərpa və yenidənqurma işlərinin sürətlə davam etdiyini, yerli sakinlərin öz yurdlarına qaytarılması işlərinə artıq başlanıldığını söyləyib. Diqqətə çatdırıb ki, bu gün Zəngilan rayonunda “ağıllı kənd” konsepsiyası əsasında yenidən salınmış Ağalı kəndinə sakinlərin köçürülməsinə başlanılıb.

Türkiyənin ailə və sosial xidmətlər naziri Derya Yanık rəhbərlik etdiyi nümayəndə heyətinin səmimi qarşılanmasına görə komitə sədrinə minnətdarlığını bildirib. O, Azərbaycanla Türkiyə arasında siyasi, iqtisadi, sosial və digər sahələrdə əlaqələrin davam etdiyini, iki ölkənin bir-biri ilə tarixi bağlarının olduğunu diqqətə çatdırıb.

Nazir Cənubi Qafqaz regionunda sülhün təmin edilməsinin, əhalinin təhlükəsiz şəraitdə yaşamasının vacib olduğunu, Türkiyənin hər zaman bölgədə bu istiqamətdə gedən proseslərə önəm verdiyini vurğulayıb. D.Yanık Azərbaycanla Türkiyə arasında əməkdaşlığın həm ölkələrimiz, həm region, həm də beynəlxalq aləmdə önəmli olduğunu diqqətə çatdırıb.

Görüşdə, həmçinin ölkələrimiz arasında ailə, qadın, uşaq problemləri sahəsində əməkdaşlığın istiqamətləri və birgə layihələr müzakirə edilib.

Xatırladaq ki, komitənin əməkdaşları bir müddət əvvəl Türkiyədə təcrübə mübadiləsində olublar.