Ermənistan Azərbaycana qarşı təcavüzkarlıq aktı törətməkdə davam edir. İyirmi altı ildir ki, atəşkəs elan olunmasına baxmayaraq, düşmən mütəmadi olaraq sərhəddə gərginlik yaradır, mülki əhalini atəşə tutur. Növbəti hərbi təxribat iyulun 12-dən başlayaraq Tovuz rayonu istiqamətində törədildi. Dünyanın bir çox ölkələri Ermənistanın təcavüzkarlıq siyasətini pisləyir, diaspor təşkilatlarımız isə Azərbaycanın haqq səsinin dünyaya çatdırılması məqsədilə dəstək aksiyasına qoşulublar. Ermənilərin yalanları artıq yerimir. Bütün dünya Ermənistanın iç üzünü tanımaqdadır. Azərbaycanın ABŞ Konqresində uğur qazanması da bunu təsdiq edir.

Bu fikirləri AZƏRTAC-a açıqlamasında Milli Məclisin deputatı Tamam Cəfərova deyib.

Deputat bildirib ki, ötən il olduğu kimi, ABŞ-ın erməni qrupları 2021-ci maliyyə ili üzrə “Milli Müdafiə Maliyyələşmə Qanunu” (National Defense Authorization Act - NDAA) layihəsinə Konqresin bəzi ermənipərəst üzvlərinin dəstəyi ilə düzəlişlərin daxil edilməsi istiqamətində səy göstəriblər. Sözügedən proses çərçivəsində Azərbaycana dəstək verən bir sıra Konqres üzvləri də öz növbəsində Ermənistan əleyhinə iki düzəliş irəli sürüblər. Qeyd edilən düzəlişlərin nəzərdən keçirilməsi məqsədilə iyulun 17-də ABŞ Konqresinin Nümayəndələr Palatasının Qaydalar haqqında Komitəsinin (Committee on Rules) iclası keçirilib.

Ermənilər 1992-ci ildəki kimi, Azərbaycana qarşı sanksiya qərarını qəbul etdirməyə çalışsalar da, məqsədlərinə nail ola bilməyiblər. Ermənistanın ikili oyun oynamaq siyasəti ABŞ Konqresində iflasa uğrayıb. Rəsmi İrəvan bir tərəfdən Azərbaycana zərbələr endirmək, hətta Avropaya açılan neft-qaz kəmərlərini belə hədəfə almaq istəyirdi, digər tərəfdən ABŞ-dan maliyyə qopartmaq niyyətində idi. Lakin arzusu gözündə qaldı. İlk dəfə olaraq Ermənistan əleyhinə düzəlişlər qəbul edildi. Bu, işğalçı Ermənistana qarşı ilk ciddi sanksiya kimi də qəbul oluna bilər.

T.Cəfərova bildirib ki, Konqresin Nümayəndələr Palatasında qəbul olunmuş çox önəmli bir düzəliş var. 296 saylı düzəlişdə Azərbaycan da daxil olmaqla, digər 3 ölkədə ərazilərin qeyri-qanuni işğalı faktı təsdiqlənir. Burada 99 saylı düzəlişin də böyük əhəmiyyəti var. Konqresdə vəziyyətin Azərbaycanın xeyrinə dəyişməsi ermənilər arasında gərginlik və narazılıq yaradıb.

Deputat ABŞ Konqresində vəziyyətin Azərbaycanın xeyrinə dəyişməsilə bağlı bəzi məqamlara toxunub. Bildirib ki, artıq Konqres Dövlət Departamenti, eləcə də ABŞ-ın müxtəlif qurumları tərəfindən bölgədə baş verən hadisələr, Ermənistanın bölgədə oynadığı pozucu və təhlükəli rolu barədə geniş məlumatlandırılıb.

“Azərbaycana maliyyə yardımının göstərilməsinin davam etdirilməsi barədə qərarın qəbul edilməsi həm Azərbaycan həqiqətlərinin dünyaya çatdırılması baxımından, həm də ABŞ-Azərbaycan münasibətlərinin perspektivləri baxımından böyük əhəmiyyətə malikdir. Amma heç cür arxayınlaşmaq olmaz. Çünki Senatda müzakirələr olacaq. Azərbaycan diasporu, xarici siyasət idarəsi daha əzmlə çalışmalı olacaq”,- deyə Tamam Cəfərova diqqətə çatdırıb.