Azərbaycanın ev sahibliyi edəcəyi III MDB Oyunlarına həsr olunmuş ilk mətbuat konfransı keçirilib.

AZƏRTAC xəbər verir ki, konfransda tədbirə hazırlıq mərhələsi haqqında media nümayəndələrinə ətraflı məlumat verilib.

Bakı Şəhər Halqası (BHŞ) Əməliyyat Şirkətinin milli mətbuat katibi Arzu Hüseynova Təşkilat Komitəsinin üzv qurumları, Gənclər və İdman Nazirliyi, BHŞ ilə birgə inzibati məsələlər, tədbir məkanlarının hazırlıq vəziyyətinə gətirilməsi, iştirakçıların akkreditasiyası, yerləşdirilməsi və digər məsələlər üzrə hazırlıq işlərininin davam etdirildiyini vurğulayıb: "Hər qəlbdə bir qələbə!" şüarı altında keçiriləcək III MDB Oyunları Azərbaycanın 7 bölgəsində - Gəncə, Qəbələ, Şəki, Yevlax. Xankəndi, Göygöl, Mingəçevir şəhərlərində təşkil olunacaq. Açılış və bağlanış mərasimi isə Gəncə şəhər stadionunda baş tutacaq. Ümumilikdə 23 idman növü üzrə 12 idman obyektində yarışlar keçiriləcək. Oyunlarda 5500-ə yaxın iştirakçı gözlənilir. Tədbirə MDB ölkələri ilə yanaşı, digər ölkələrin də dəvət olunması nəzərdə tutulur".

BHŞ rəsmisi Oyunlarda medallarla bağlı narazılıq və problemin olmaması üçün maksimum dərəcədə çalışacaqlarını diqqətə çatdırıb. O, yarışlarda milli komandanın qarşısına ən yüksək hədəflərin qoyulacağını da deyib.

Sonra mətbuat konfransında III MDB Oyunlarının maskotları - enerjili, mehriban Bəbir və Leyla ictimaiyyətə təqdim olunub. Onların Qafqaz bəbirinin obrazında yaradılmaqla, sadəcə simvol deyil, həm də Azərbaycanın zəngin təbiətini, gücünü və qonaqpərvərliyini parlaq şəkildə təcəssüm etdirildiyi qeyd edilib.

Ardınca III MDB Oyunlarının rəsmi internet saytı təqdim olunub. Bildirilib ki, artıq istifadəyə verilən www.cisgames2025.com saytında tədbirlə bağlı hazırlıq prosesi, yarış cədvəlləri, idman məkanları, könüllü və media qeydiyyatı ilə bağlı ən son yenilikləri əldə etmək mümkün olacaq.

Bakı Şəhər Halqasının İnsan Resursları və İşçi Qüvvəsi Şöbəsinin rəhbəri İranə Əhmədova III MDB Oyunları ilə əlaqədar Könüllü Proqramına start verildiyini söyləyib: "Proqram çərçivəsində paytaxt Bakı və əsasən də regionlardan 3000-ə yaxın könüllünün Oyunlara cəlb olunması gözlənilir. Qeyd etmək lazımdır ki, bölgələrdə bu istiqamətdə bir sıra tədbirlər görülür, gənclərlə maarifləndirici görüşlər keçirilir. Əsas məqsəd region gənclərinin bacarıqlarının inkişafına, onların beynəlxalq müstəvidə təcrübə və biliklərinin artmasına dəstək olmaqdır”.

Sonda media nümayəndələrini maraqlandıran suallar ətraflı cavablandırılıb.

Qeyd edək ki, III MDB Oyunları sentyabrın 28-dən oktyabrın 8-dək davam edəcək.