İtkin düşmüş şəxslər üzrə Beynəlxalq Komissiya ilə imzalanan protokola uyğun olaraq, Beynəlxalq Komissiya Azərbaycana itkin düşmüş şəxslərlə əlaqədar müvafiq yardım edəcək. Bura eyniləşdirmə, meyit qalıqlarının axtarışı, dəqiqləşdirilməsi ilə bağlı müvafiq kömək daxildir.

AZƏRTAC xəbər verir ki, bunu aprelin 4-də keçirilən mətbuat konfransında Əsir və itkin düşmüş, girov götürülmüş vətəndaşlarla əlaqədar Dövlət Komissiyasının katibi, İşçi qrupunun rəhbəri İsmayıl Axundov deyib.

İsmayıl Axundov Beynəlxalq Komissiyanın iş prinsipi və gördüyü işlər barədə məlumat verib. Qeyd edib ki, Birinci Qarabağ müharibəsi ilə əlaqədar Ermənistan tərəfindən 100 nəfərə aid olması ehtimal edilən meyit qalıqları verilib. Bundan əlavə Birinci Qarabağ müharibəsində itkin düşmüş 60 nəfərə aid olması ehtimal edilən meyit qalıqları müvafiq qurumların əməkdaşları tərəfindən aşkarlanıb. Dövlət Komissiyası Azərbaycanda itkin düşmüş şəxslər üzrə məlumat bazasının yaradılması istiqamətində çox ciddi işlər aparır.

Sonra çıxış edən İtkin düşmüş şəxslər üzrə Beynəlxalq Komissiyanın baş direktoru Katrin Bomberger Dövlət Komissiyası ilə protokol imzalamaqdan məmnunluğunu bildirib. O, məqsədlərinin itkin düşmüş şəxslərin yerini müəyyənləşdirmək, qalıqlarını aşkarlamaq olduğunu diqqətə çatdırıb.

K.Bomberger səfər zamanı Azərbaycana itkin düşmüş şəxslərin ailələrinə yardım, bu sahədə onların iştirakının vacibliyindən, itkin düşmüş şəxslərin axtarışı sahəsində təcrübələri barədə danışıb. O qeyd edib ki, Beynəlxalq Komissiya müasir texnologiyaların tətbiqi ilə itkin düşmüş şəxslərin tapılmasına çalışacaq. Baş direktor DNT analiz nümunələrinin toplanması və laborator analizlər vasitəsilə insanların şəxsiyyətinin müəyyənləşdirilməsinin vacibliyini vurğulayıb.