Azərbaycan ərazisində istehsal edilən filmlər üzrə çəkilmiş xərclərin 40 faizə qədəri dövlət tərəfindən geri ödəniləcək.

AZƏRTAC xəbər verir ki, bunu filmlərin istehsalı üçün çəkilmiş xərclərin qismən geri ödənilməsi ilə bağlı qaydaların təqdimatına həsr olunmuş mətbuat konfransında Azərbaycan Respublikası Kino Agentliyinin (ARKA) Baş direktoru Rəşad Əzizov deyib.

R.Əzizovun sözlərinə görə, 2023-2025-ci illər ərzində bu istiqamətdə görülmüş işlər, hüquqi sənədlər və tətbiq olunacaq mexanizmlər ictimaiyyətə təqdim olunub.

O diqqətə çatdırıb ki, Azərbaycan Respublikası Prezidentinin 29 may 2025-ci il tarixli Sərəncamı və Nazirlər Kabinetinin 4 iyul 2025-ci il tarixli Qərarı ilə film istehsalına dövlət dəstəyi mexanizmi təsdiqlənib.

Onun sözlərinə görə, qərara əsasən, filmlərin istehsalı üçün çəkilmiş xərclərin 40 faizə qədəri geri ödəniləcək. "Bu proses kino sənayesinin inkişafına böyük təkan verəcək. Təsdiq edilmiş qərar nəticəsində yeni iş yerləri formalaşacaq, mədəni yaradıcı sənayelərin kino sahəsində həcmi artacaq. Geri ödəniləcək xərclərin 25 faizi əsas rebeyt, 15 faizi isə mədəni senzə dair əlavə rebeytdir. Bununla da artıq yerli şirkətlər yüksək keyfiyyətə malik avadanlıqların istehsalına təkan verə biləcək".

O, həmçinin vurğulayıb ki, bu təşəbbüs ölkədə film istehsalına investisiyaları artırmaq, beynəlxalq prodüserləri cəlb etmək və yerli kino sənayesinin inkişafını sürətləndirmək məqsədi daşıyır.