Martın 7-də Azərbaycan Yazıçılar Birliyi (AYB) və “Dədə Ələsgər Ocağı” İctimai Birliyinin birgə təşkilatçılığı ilə şair, publisist Salman Qaraların “Adım Ələsgərdi..." adlı yeni kitabının təqdimatı və imza günü keçirilib.

AZƏRTAC xəbər verir ki, təqdimat mərasimindən əvvəl aşıq ədəbiyyatının görkəmli nümayəndəsi Aşıq Ələsgərin abidəsi ziyarət olunub. İştirakçılar abidə önünə əklil və gül dəstələri qoyaraq böyük saz və söz ustadına ehtiramlarını bildiriblər.

Tədbirdə AYB-nin sədri, Xalq yazıçısı Anar çıxış edərək, Dədə Ələsgər irsinin tədqiq olunmasının əhəmiyyətini vurğulayıb və Salman Qaraların bu sahədə mühüm işlər gördüyünü deyib.

“Dədə Ələsgər Ocağı” İctimai Birliyinin sədri Xətai Ələsgərli kitabın əhəmiyyətindən bəhs edərək, Dədə Ələsgər irsinin öyrənilməsi və gələcək nəsillərə çatdırılmasının mühüm vəzifə olduğunu söyləyib. O, "Adım Ələsgərdi..." adlı tədqiqat əsərinin bu istiqamətdə dəyərli bir töhfə olduğunu bildirərək, müəllifin uzun illər apardığı araşdırmalar nəticəsində Dədə Ələsgərin həyatına və yaradıcılığına dair bir çox yeni faktları üzə çıxartdığını qeyd edib.

Azərbaycan Yazıçılar Birliyinin İdarə Heyətinin üzvü, ədəbi tənqidçi Əsəd Cahangir Aşıq Ələsgərin yaradıcılığı haqqında danışarkən onun ədəbiyyatımızdakı əvəzsiz roluna nəzər salıb: “Baharın nəfəsinin duyulduğu bu vaxtda ölməz Aşıq Ələsgərin əsərləri yenidən insanların qəlbini fəth edir. Elə bir şəxs tapmaq çətindir ki, Aşıq Ələsgər yaradıcılığından bir cümlə də olsun bilməsin. O, folklor poeziyamızın əbədi zirvəsidir”.

Kitabın müəllifi Salman Qaralar əsərin yazılma prosesindən danışıb. O, Dədə Ələsgər irsinin tədqiqinə uzun illər vaxt sərf etdiyini diqqətə çatdırıb. “Kitabda Dədə Ələsgərin yaradıcılığı yalnız şeirləri və aşıq sənəti ilə deyil, həm də onun mənəvi dünyası və Azərbaycan ədəbiyyatına təsiri baxımından araşdırılıb. Kitabın gələcəkdə Dədə Ələsgər haqqında aparılacaq yeni tədqiqatlara töhfə verəcəyinə ümid edirəm”,- deyə o əlavə edib.

Tanınmış ədəbiyyatşünaslar çıxışlarında kitabın Aşıq Ələsgərin irsinin dərindən öyrənilməsinə və mənimsənilməsinə verəcəyi töhfələrdən söhbət açılıb.

Sonda ədəbiyyat və mədəniyyət sahəsindəki xidmətləri yüksək qiymətləndirilən Xətai Ələsgərli AYB-nin fəxri üzvü seçilib.