İyulun 14-də Azərbaycan Voleybol Federasiyasının (AVF) 2023-cü ilin ilk altı ayının yekunlarına həsr olunmuş mətbuat konfransı keçirilib.

AZƏRTAC xəbər verir ki, konfransda AVF-nin prezidenti Şahin Bağırov, vitse-prezidentlər Faiq Qarayev və Bəhruz Quliyev, baş katib Faiq Orucov, İdarə Heyətinin üzvləri və media nümayəndələri iştirak ediblər.

Tədbiri giriş sözü ilə açan Şahin Bağırov qonaqları salamlayıb, AVF-nin bu müddətdəki fəaliyyətindən, voleybolun paytaxtla yanaşı, bölgələrdəki inkişafı istiqamətində həyata keçirilən tədbirlərdən danışıb. Həmçinin qarşıda görüləcək işlər haqqında məlumat verib.

Sonra hesabat məruzəsi ilə çıxış edən Faiq Orucov bu müddətdə ölkə voleybolunun inkişafı istiqamətində həyata keçirilən tədbirlərdən danışıb, uşaq voleyboluna xüsusi diqqət ayrıldığını vurğulayıb. Uşaq və gənc voleybolunun inkişaf etdirilməsi məqsədilə türk mütəxəssis Şahin Çatmanın ölkəmizə dəvət olunduğunu bildirib. F.Orucov təcrübəli mütəxəssislə müqavilə imzalandığını və avqustdan fəaliyyətə başlayacağını vurğulayıb. Həmçinin onun artıq paytaxtda və bölgələrdə bir sıra seleksiya işləri apardığını, voleybolla məşğul olan, müvafiq kriteriyalara uyğun gələn 150-yə yaxın qız və oğlanın müəyyənləşdirildiyini də əlavə edib. Vurğulayıb ki, avqustda yenidən həmin uşaqlar arasında seçim ediləcək.

Baş katib bu ilin ilk yarısında keçirilən turnirlərdən də danışıb. Bildirib ki, Azərbaycan çempionatının 2022-2023-cü illər mövsümündə qadın və kişilər arasında həm Yüksək Liqa, həm də Birinci Liqa yarışları baş tutub. Eyni zamanda Ulu Öndər Heydər Əliyevin anadan olmasının 100 illiyinə həsr olunmuş qadınlar və kişilər arasında kubok yarışı, veteran kişi voleybolçular arasında turnir, “Heydər Əliyev-100. Voleybola dəstək marafonu” təşkil olunduğunu diqqətə çatdırıb.

Məruzəçi, həmçinin 15 yaşlı və 15 yaşdan yuxarı oğlan və qızlar arasında keçirilən çimərlik voleybolu üzrə Azərbaycan çempionatı (I mərhələ) haqqında, bölgələrdə təşkil edilən seleksiya yarışları haqqında danışıb.

Tədbirdə son mövsümdə ölkə xaricində çıxış edən və müxtəlif mükafatlar qazanan millimizin üzvləri haqqında məlumat verib.

Faiq Orucov avqustda start götürəcək Avropa çempionatında iştirak edəcək qadınlardan ibarət milli komandamıza yeni baş məşqçi təyin olunduğunu bildirib. Mayda türk Ataman Güneyligillə müqavilə imzalandığını söyləyən F.Orucov yığmamızın hazırda təcrübəli mütəxəssisin rəhbərliyi ilə məşqlərə davam etdiyini vurğulayıb. Həmçinin tələbə oğlanlardan ibarət millimizin Çində keçiriləcək Universiadaya hazırlığından da danışıb.

Daha sonra jurnalistlərin sualları cavablandırılıb.