Martın 18-də Qazaxıstan Elm və Təhsil İşçiləri Həmkarlar İttifaqının (QETİHİ) sədri Aygül Mukaşevanın rəhbərlik etdiyi nümayəndə heyəti Azərbaycan Həmkarlar İttifaqı Konfederasiyasında olub.

AZƏRTAC xəbər verir ki, Azərbaycan Həmkarlar İttifaqları Konfederasiyasının sədri Səttar Möhbalıyev görüşdə iki ölkə arasındakı münasibətlərdən danışaraq əlaqələrimizin daha da inkişaf etdirilməsinin vacibliyini vurğulayıb. 44 günlük Vətən müharibəsindən sonra Azərbaycanın yeni inkişaf və quruculuq mərhələsinə qədəm qoyduğunu diqqətə çatdıran S.Möhbalıyev ölkəmizdə bütün sahələrdə əldə olunan nailiyyətlərdən söz açıb.

Görüşdə iki ölkənin həmkarlar ittifaqları arasında mövcud olan əlaqələrdən, əməkdaşlığın daha da möhkəmləndirilməsi istiqamətində görülən işlərdən və gələcək perspektivlərdən danışılıb.

AHİK sədri bildirib ki, Azərbaycan-Qazaxıstan əlaqələri sosial, siyasi, iqtisadi, mədəni və digər sahələrdə uğurla inkişaf etməkdədir.

Azərbaycan həmkarlar ittifaqlarının fəaliyyətindən söz açan AHİK sədri deyib ki, ölkəmizdə ən böyük ictimai təşkilat olan həmkarlar ittifaqları yeni cəmiyyət quruculuğunda fəal iştirak edir, sosial siyasətin həyata keçirilməsində önəmli rol oynayır, dövlətin bütün çağırışlarına, o cümlədən sosialyönlü təkliflərinə adekvat cavab verir.

S.Möhbalıyev əlavə edib ki, bu gün həmkarlar ittifaqları Azərbaycanda əmək prosesinə cəlb olunmuş vətəndaşlarımızın hüquqlarının müdafiəçisi kimi ölkəmizdə fəaliyyət göstərən bütün müəssisələrdə iş şəraitinin müasir standartlara uyğunlaşdırılması, sosial problemlərin həlli və əmək hüquqlarının təmin olunması sahəsində yeni metod və vasitələrdən istifadə edərək daha ardıcıl və məqsədyönlü iş aparır.

S.Möhbalıyev, həmçinin Azərbaycanın uğurlu təhsil siyasətindən də bəhs edib.

"Azərbaycan xalqına və dövlətinə böyük sevgimiz var", - deyən Qazaxıstan Elm və Təhsil İşçiləri Həmkarlar İttifaqının sədri Aygül Mukaşeva ölkələrimiz arasında əlaqələrin dərin tarixi kökləri olduğunu vurğulayıb.

Qazaxıstan və Azərbaycan arasında münasibətlərin yüksək səviyyədə inkişafından məmnunluğunu ifadə edən qonaq ölkələrimiz arasında qarşılıqlı səfərlərin, təcrübə və fikir mübadiləsinin əhəmiyyətini qeyd edib.

Aygül Mukaşeva Qazaxıstan həmkarlar ittifaqlarının gördüyü işlər haqqında ətraflı məlumat verib. O, Azərbaycan və Qazaxıstan həmkarlar ittifaqları arasında münasibətlərin davamlı olaraq inkişaf etdiyini, qarşılıqlı səfərlər təşkil edildiyini, təcrübə və fikir mübadilələrinin aparıldığını deyib. Bildirilib ki, bu əlaqələrin daha da inkişafı üçün gələcəkdə də səylər davam etdiriləcək.

Daha sonra tədbirdə Azərbaycan Təhsil İşçiləri Azad Həmkarlar İttifaqı Respublika Komitəsi ilə Qazaxıstan Elm və Təhsil İşçiləri Həmkarlar İttifaqı arasında ikitərəfli əməkdaşlıq müqavilələri imzalanıb. Müqavilədə elm və təhsil işçilərinin sosial, iqtisadi, əmək hüquqlarının qorunması, əməkdaşlığın inkişafı və möhkəmləndirilməsi, təminatı və müdafiəsi, təhsil sahəsində dövlət siyasətinin formalaşdırılmasında həmkarlar ittifaqlarının rolunun artırılması, həmkarlar ittifaqlarının fəaliyyət metodikasının təkmilləşdirilməsi və təcrübə mübadiləsinin aparılması, tərəflərin mövqelərinin milli və beynəlxalq səviyyələrdə əlaqələndirilməsi, elm və təhsil sahələrində dövlət siyasətinin formalaşdırılmasında həmkarlar ittifaqlarının rolunun artırılması üçün səylərini birləşdirməsi, fəaliyyətlərini əlaqələndirilməsi və digər kimi məsələlər öz əksini tapıb.