Sentyabrın 3-də Azərbaycan Otorinolarinqologiya Cəmiyyətinin 1-ci Beynəlxalq konqresi başa çatıb.

AZƏRTAC xəbər verir ki, Əziz Əliyev adına Azərbaycan Dövlət Həkimləri Təkmilləşdirmə İnstitutu, Azərbaycan Otorinolarinqologiya Cəmiyyəti və Mərkəzi və Qərbi Asiya Qulaq-burun-boğaz və Baş-boyun Cərrahiyyəsi Birliyinin təşkilatçılığı ilə keçirilən konqres öz işini panel iclasları ilə davam etdirib.

“Adenotonzillektomiyalarda müasir texnikalar”, “Otorinolarinoloji patologiyalarda radioloji müayinələr”, “Sensonevral eşitmə zəifliyi olan uşağa yanaşma”, “Uşaqlarda eşitmə itkisi səbəbləri və həlli yolları”, ”Baş və boyun şişlərinə yanaşma”, “Ani eşitmə itkisi”, “Otorinolarinqoloji praktikada udam və qalxanabənzər vəzi problemləri”, “Timpanoplastika texnikaları”, “Pedarrik otorinolarinqologiyada yeniliklər”, “Xroniki sinusitlər və nazal polipoz”, “Burun tənəffüz pozulmaları və yuxu apnoesi” və digər mövzularda panel iclasları keçirilib. Məruzələrdə yeni növ koronavirus (COVID-19) pandemiyasının müxtəlif xroniki xəstəliklərə təsir etməsinə xüsusi diqqət yetirilib.

Konqresin yekununda iştirakçılara sertifikatlar təqdim olunub