Azərbaycan millisinin üzvü: Hər zaman Modriç kimi futbolçu olmaq istəmişəm - MÜSAHİBƏ
ID:
24.01.2024 12:20 / İDMAN
Foto : AZƏRTAC /Səfiyar Məcnun
“Qadın idmançılar” rubrikasının ilk qonağı Azərbaycan millisinin və “Neftçi” komandasının futbolçusu Aysun Seydiyevadır.
“Qadın idmançılar” rubrikasının ilk qonağı Azərbaycan millisinin və “Neftçi” komandasının futbolçusu Aysun Seydiyevadır. Yarımmüdafiəçi AZƏRTAC-a müsahibəsində futbola gəlişi, hazırkı karyerası və gələcək planları barədə danışıb.
- Futbolçu olmaq istəyiniz necə yarandı?
- Qardaşımın məhəllədəki oyunlarına baxırdım. Mənə çox maraqlı gəlirdi. Evdə corabdan top düzəldib oynayırdıq. Həm də qardaşımla birlikdə yerli və xarici çempionatlarda keçirilən oyunlara baxırdıq.
- İlk klubunuz hansı olub?
- "Neftçi"nin oğlanlardan ibarət U-10 komandası.
- Oğlanlarla oynamaq sizə hansı çətinliklər yaradırdı?
- Oğlanlar fiziki cəhətdən daha güclü olurlar. Həm də onlar meydanda daha tez qərar verməyi bacarırlar. Əslində oğlanlarla oynamaq qızlara qarşı mübarizə aparmaqdan daha rahatdır. Çünki onlardan daha çox şey öyrənirsən. Oğlanlarla məşq etdiyimə görə artıq buna öyrəşmişdim. Belə demək olarsa, eyni səviyyədə çıxış edirdim. AFFA oğlanlarla birlikdə çempionatda oynamağa icazə verməsə də, məşqçim Adil müəllim federasiya ilə bu barədə danışdı və mənim meydana çıxmağıma şərait yaradıldı.
- Ailənizdə futbolu seçməyinizi ən çox kim dəstəklədi?
- İlk dəstəyi heç kimdən almamışam. Mən 14 il əvvəl futbola başlamışam və o zaman hər şey fərqli idi. İnsanlar mentalitetə uyğun hərəkət edirdilər. Milli komandaya cəlb olunduqdan sonra isə anam və qardaşım hər zaman yanımda oldu.
- Hazırda Azərbaycanda qadın futboluna münasibət necədir?
- Əvvəllər futbolçu qız tapmaq çətin idi. İndi isə qadın komandaların sayı artıb, qızlarda futbola maraq yaranıb. Aşağı yaş qruplarına nəzər saldıqda görərik ki, gələcəkdə çoxlu qadın futbolçu görə bilərik.
- Sizin dövrünüzdə oynayan qadın futbolçulardan bəziləri sonadək karyeralarını davam etdirmədilər. Məsələn, "Sabah"ın üzvü Namiq Ələsgərovun həyat yoldaşı Nigar Cəlili buna nümunə çəkmək olar. Belə görünür ki, qadın futbolçulara ailə həyatı qurmaq karyeraların qarşısına sədd çəkir...
- Bəli, bir çoxları futbol oynamaqdan uzaqlaşdılar. Nigarın öz seçimi oldu. Əminə Heydərova var idi. İndi AFFA-da işləyir. Onlar öz qərarları ilə bu addımı atdılar. İndi həmin qızlardan məşqçi kimi fəaliyyət göstərənləri də var.
- Legioner həyatı yaşamısınız. Azərbaycandakı qadın futbolu ilə Avropa ölkələri arasında nə kimi fərqlər var?
- Ən böyük fərq maddi məsələlərlə bağlıdır. Türkiyədəki klublar kişi komandalarındakı kimi rəsmi müqavilə bağlayır. Əvvəlcə menecer danışır və daha sonra razılıq əldə olunur. Azərbaycanda isə belə qayda yoxdur.
- Futbolçu olandan sonra hansı problemlərlə üzləşdiniz ?
- Ən böyük problem qadın futbolunun maddi cəhətdən ön planda olmamasıdır. Başqa böyük çətinliklə üzləşməmişəm. Kənardan insanların fikirlərinə də heç vaxt əhəmiyyət verməmişəm.
- Başqa hansısa idmanla məşğul olmusunuz?
- Doqquz yaşım olanda yüngül atletika ilə məşğul olmuşam. Sonra basketbolla maraqlanmağa başladım. Alınmayacağını hiss etdim. Evdəkilər futbol oynamağıma icazə vermədikləri üçün basketbol adı ilə futbol məşqlərinə gedirdim (gülür).
- Futbolçu olmasaydınız, hansı sahə ilə məşğul olardınız?
- Yəqin ki, basketbolla məşğul olardım. Çünki bu idman növünü futbola daha yaxın hiss edirəm (gülür).
- Futbolçu olmağınız təhsilinizə mane oldumu?
- Hər ikisini bir arada idarə etmək çox çətin idi. Məktəbdə 7-ci sinfə kimi çox yaxşı oxumuşam. Məqsədim jurnalistika fakültəsinə daxil olmaq idi. Təəssüf ki, məşqlər və milli komanda ilə 2010-cu il dünya çempionatın hazırlaşmağımız arzularımın üstündən xətt çəkdi. Hər gün iki məşq edirdik. Buna görə də universitetə sənəd verməyi dayandırdım.
- Kumiriniz olan futbolçu varmı?
- Qadınlarda ABŞ millisinin üzvü Aleks Morqanı bəyənirəm. Kişilərdə isə Xavi, İniesta, Modriç və Pirlo sevimli oyunçularım olub. Hər zaman istəmişəm ki, Modriç kimi futbolçu olum (gülür).
- Bəs Azərbaycanda hansı futbolçunu bəyənirsiniz?
- Azərbaycanlı futbolçular arasında kumirim isə Amin Seydiyevdir (gülür).
- Hansı məşhur komandada çıxış etmək istərdiniz?
- "Barselona"da oynamaq istəyərəm. Xəyal olaraq uzaq olsa da, lakin yaxşı menecer olsa, arzularımı reallaşdıra bilərəm. Yadımdadır, Nigar, qapıçımız Aytac və mən 16 yaşımızda İspaniyaya getmişdik. Lakin yaş məsələsinə görə yalnız Nigar bir il - orada "Kanilas" klubunda çıxış etdi. Biz isə geri qayıtdıq.
- Artıq bir neçə ildir ki, Azərbaycan millisinin və “Sabah” klubunun müdafiəçisi Amin Seydiyevlə evlisiniz. Maraqldır, Aminlə tanışlığınız necə yaranıb?
- Biz Aminlə bir-birimizi uzun müddətdir tanıyırdıq. Hər zaman milli komandaya dəstək olmaq üçün onun oyunlarına da baxmağa gedirdim. Mən Türkiyədə olanda onunla danışdıq və razılaşdıq. Dörd ildir evliyik. Hər şey çox gözəldir.
- Ailə həyatı qurduqdan sonra hansısa qadağalarla üzləşdiniz?
- Amin mənə heç bir qadağa qoymur. Hər zaman dəstək olur. Çox xoşbəxtəm ki, onun kimi insanla ailə həyatı qurmuşam.
- İdmançı ailəsində olmaq çətindir. Çünki cütlüklərin bir-birlərinə ayıracaq zamanı az olur. Sizdə bu baxımından hər hansı problem varmı?
- Bəli, çətinliklər olur. Məsələn, Amin bu ay "Sabah" klubu ilə Antalyaya təlim-məşq toplanışı getmişdi. Bəzən mən millinin düşərgəsində oluram. Ancaq maraqlıdır. Çünki bir-birimizdən ötrü daha çox darıxırıq.
- Səhv etmirəmsə, ailə məsələsinə görə ölkə xaricinə yollanmadınız. Gələcək illərdə legioner həyatı yaşamağı düşünürsünüz?
- Bəli, düz qeyd etdiniz. Ailə məsələsinə görə Avropaya yollanmaq çətindir. Əgər Amin xarici klublardan birinə keçsə, həmin komandada qız futbolu olarsa, gedərəm. Amma hazırkı vəziyyətdə alınmır. Çünki övladımız balacıdır və ona zaman ayrılmalıyam.
- Sizin jurnalist sahəsində işləmək marağınızın olduğunu bilirəm. Gələcəkdə buna uyğun planınız var?
- Bu barədə düşünmüşəm. Ancaq hazırkı vəziyyətdə fikrimi ailəmə və “Neftçi”dəki işlərimə yönəltmişəm. Əgər mövsümün sonuna kimi dəyişiklik olmasa, fərqli qərar verə bilərəm.
- Hazırda “Neftçi”də çıxış edirsiniz. Bu komandadakı işləriniz necə gedir? Hədəfləriniz nədir?
- Hazırda Azərbaycanda qadın futboluna ən çox dəstək olan "Neftçi" klubudur. Bu komandada hər şey peşəkar səviyyədə qurulub. Hədəf çempion olmaq və növbəti ildə Çempionlar Liqasında iştirak etməkdir.
- Sizcə, kişi futbolunda ölkənin ən yaxşı cinah müdafiəçisi kimdir?
- Amin Seydiyevi deyərdim. Düzünü demək lazımdır, o, öz mövqeyinin ən yaxşısıdır (gülür).
- Meydanda Amin Seydiyevlə rəqib olsanız, ona qarşı necə mübarizə apararsınız?
- Amin meydanda imkan verər ki, onu keçim? O, fiziki cəhətdən daha güclüdür. Ancaq ona qarşı yaxşı mübarizə apararam.
- Milli komanda UEFA Millətlər Liqasında tarixi nəticə qazandı. Bu uğuru necə şərh edərdiniz?
- Ötən il bizim milli komanda üçün çox uğurlu keçdi. Çoxlu qələbələr qazandıq, Millətlər Liqasında B Divizionuna yüksəldik. Düşünürəm ki, bunun da səbəbi qızların Avropa klublarında çıxış etməsidir.
2024 © AZƏRTAC. Müəllif hüquqları qorunur. Məlumatdan istifadə edərkən hiperlinklə istinad olunmalıdır.