Fevralın 12-də Azərbaycan İdman Jurnalistləri Assosiasiyası (AİJA) 2021-ci ilin idman laureatlarını mükafatlandırıb.

AZƏRTAC xəbər verir ki, tədbirdə çıxış edən AİJA-nın prezidenti Eldar İsmayılov ölkəmizdə idmana dövlət səviyyəsində diqqət və qayğı göstərildiyini vurğulayıb. E.İsmayılov 2021-ci ildə Azərbaycan idmançılarının beynəlxalq arenalarda qazandığı nailiyyətlərdən danışıb. AİJA-nın ötən illərdəki fəaliyyəti barədə məlumat verən E.İsmayılov 1995-ci ildə yaradılan qurumun Beynəlxalq İdman Mətbuatı Assosiasiyasında (AIPS) ölkəmizi uğurla təmsil etdiyini vurğulayıb. O qeyd edib ki, assosiasiya 1996-cı ildən başlayaraq, idman mətbuatı və jurnalistləri arasında fərqlənənləri təltif edir.

Sonra AİJA-nın fəaliyyətindən bəhs edən videoçarx nümayiş etdirilib.

Tədbirin sonunda qaliblərə mükafatlar təqdim olunub.

Qeyd edək ki, Azərbaycan Dövlət İnformasiya Agentliyi (AZƏRTAC) ilin idman xəbərlərini ən yaxşı işıqlandıran informasiya agentliyi elan olunub.

Tədbirdə Olimpiya mükafatçıları, idman cəmiyyətlərinin və klublarının nümayəndələri, eləcə də tanınmış idmançılarımız iştirak ediblər.