Ermənistan silahlı qüvvələri Tovuz istiqamətindəki mövqelərimizi ələ keçirmək məqsədilə hücuma cəhd etdilər. Azərbaycan ordusunun Tovuz rayonunda keçirdiyi döyüş əməliyyatları xalqımızın doğma torpaqları uğrunda mübarizə əzminin ifadəsidir. Ermənistan tərəfinin Azərbaycan torpaqlarına növbəti hücumu isə bu qəsbkar ölkənin işğalçılıq siyasətindən əl çəkmədiyini göstərir. Dünya ictimaiyyəti yaxşı bilir ki, hazırda Ermənistanda siyasi və iqtisadi böhran hökm sürür. Bu isə Paşinyan rejimini çətin vəziyyətə salıb. Ermənistan hərbi birləşmələrinin Tovuz rayonundakı ərazilərimizə gözlənilməz hücumu ölkə daxilində diqqətin böhran vəziyyətindən hərbi müstəviyə yönəldilməsinə hesablanmış çürük siyasətin təzahürüdür.

Bu fikirləri AZƏRTAC-a açıqlamasında AMEA-nın Nizami Gəncəvi adına Ədəbiyyat İnstitutunun elmi katibi, filologiya üzrə fəlsəfə doktoru Mehman Həsənli deyib. O vurğulayıb ki, Prezident İlham Əliyev Azərbaycan xalqının möhkəm birliyinə, ölkə rəhbərinə sədaqətinə və inkişaf etmiş müstəqil dövlətimizin hərbi-iqtisadi gücünə arxalanır.

“Qoy Ermənistanın yarıtmaz rəhbərləri qəti şəkildə bilsinlər ki, Azərbaycan xalqı və ordumuz Prezident İlham Əliyevin rəhbərliyi ilə istənilən vaxt onların layiqli cavabını verəcək, Dağlıq Qarabağı da azad edəcək. Xalqın etimadını itirmiş Ermənistan rəhbərliyi, Paşinyan rejimi isə məkrli siyasi oyunlardan uzağa gedə bilmir və iflasa məhkumdur. Dövlətimizin başçısı İlham Əliyevin Təhlükəsizlik Şurasının iclasındakı çıxışı hər bir azərbaycanlı üçün çağırışdır. Azərbaycan xalqı, gənclərimiz Prezidentin hər bir çağırışına və əmrinə həmişə hazırdır. Azərbaycan gəncliyi inanır ki, Prezidentimizin apardığı müdrik və cəsarətli siyasət xalqımızı qələbəyə çatdıracaq”, - deyə Mehman Həsənli qeyd edib.