Dünya Azərbaycanlılarının Həmrəyliyi Günü və Yeni il ərəfəsində Əmək və Əhalinin Sosial Müdafiəsi Nazirliyi tərəfindən müharibə, hərbi xidmət vəzifələrini yerinə yetirməklə, habelə Çernobıl AES-də hərbi xidmətlə əlaqədar əlilliyi olan şəxslərə avtomobillərin təqdim olunması tədbirində yeni minik maşınına sahib olanlardan biri də Azər Şəfiyevdir. O, 2013-cü ildə iş zamanı qəza ilə üzləşərək əlillik dərəcəsi alıb. İkinci qrup əlilliyi olan şəxs kimi 2015-ci ildən əmək fəaliyyətindən ayrılaraq pensiyaya çıxıb.

“Bu il Azərbaycan xalqının qazandığı tarixi Zəfər duyğularıma qanad verib. Prezident, Ali Baş Komandan İlham Əliyevin sərkərdəlik məharəti, şəhidlərimzin canı, igidlərimizin qanı, qazilərin çox böyük fədakarlığı sayəsində haqq savaşında tarixi torpaqlarımız əzəli sahibinə qayıdıb. Bundan böyük nə arzu ola bilər?”, - deyə Azər AZƏRTAC-ın müxbirinə bildirib.

O, fikrini belə davam etdirib: “Məni ən çox sevindirən 44 günlük Vətən Müharibəsində Qarabağın yağı tapdağından, düşmən əsarətindən azad olunmasıdır. Bu, o deməkdir ki, mən doğma Füzulidəki ata yurdumuza qayıdacağam. Bu o deməkdir ki, mən yenidən Ərgünəş dağına, Məngələnata yüksəkliyinə qalxıb yurdumuzun gözəlliklkərini seyr edə biləcəyəm. Bu o deməkdir ki, mən yenə Quruçayın, Qozluçayın, Köndələnin, Çərəkənin nəğməli sularının zümzüməsinə qulaq kəsilə biləcəyəm. Ona görə hədsiz dərəcədə sevinirəm. Şübhəsiz ki, yeni avtomobillə üz tutacağım məkanlardan biri elə doğma Füzuli olacaq”.