Aqrar və mədən sənayesi ölkəsi olan Mərakeş Afrikanın müasir iqtisadi xəritəsində görkəmli yer tutur. Ərəblərin “uzaq Qərb” adlandırdıqları Mərakeşdə Afrika ilə ərəb dünyası - Aralıq dənizinin əlverişli iqlimi ilə Saxaranın yandırıcı hərarəti, həmçinin ultramüasir şəhərləri ilə ölkədə köçəri həyat sürən əhalinin patriarxal həyat tərzi qəribə şəkildə birləşir. Mərakeş Avropadan bir neçə kilometrlik məsafədə yerləşsə də, orada həyat tamam başqa cür yaşanır. Bura təkcə çox dadlı mandarinlərin vətəni deyil, eyni zamanda, çoxəsrlik ənənələrin, arxitektura şedevrlərinin və qeyri-adi mənzərələrin də məskənidir.

Əkinçilik ölkənin yerli əhalisinin əsas məşğuliyyəti sayılır. Köçərilər iri və xırda buynuzlu heyvanlar və dəvələr yetişdirirlər. Xalq sənəti - dulusçuluq, xalçaçılıq, dəri və ağac üzərində oyma işi ilə məşğul olanlar da var. Mərakeş Şimali Afrikada turist axınına görə qabaqcıl ölkə sayılır. Xarici turizm dövlətin büdcəsinə yaxşı gəlir gətirir.

Mərakeşlilər çoxlu çörək yeyirlər və bütün ailələrdə bu nemətə sayğı ilə yanaşırlar. Yeyilməmiş çörəyin artıqları heyvanlara verilir. Əgər evdə heyvan yoxdursa, onu təmizləyici vasitələrlə dəyişdirmək mümkündür. Burada çörək atmaq yasaq ayılır. Başqa bir yasaq qaynar su ilə bağlıdır. Qab yuyarkən və ya çaydanın dibində qaynar su qalıbsa, onu heç vaxt rakovinə tökmək olmaz. Əgər qaynar su dolu çaydanı rakovinə boşaldılanda mütləq soyuq suyu axıra qədər açmaq lazımdır. Ətdən imtina kobudluq sayılır. Sol əllə yemək düzgün hesab edilmir. Yeməyi daha çox işarət barmağından istifadə etmək şərtilə ancaq sağ əllə yemək lazımdır.

Mərakeşdən İspaniyada maşınların necə hərəkət etdiyinə baxmaq olar. Belə deyək ki, Mərakeşi tərk etmədən Avropaya düşmək mümkündür. Qırmızı-qəhvəyi rəngdə olan marokko ağacı ancaq Atlas dağlarının ətəyində yetişir. Bu nadir və çox gözəl ağacdan ancaq “Rolls-Royce”, “Mercedes”, “BMW” markalı avtomobillərin salonlarının hazırlanmasında istifadə edirlər.

AZƏRTAC-ın fotomüxbiri Nicat Haşımov bu yaxınlarda Mərakeşin paytaxtı Rabatda olarkən ölkə həyatının ayrı-ayrı sahələrini əks etdirən maraqlı kadrlar lentə alıb. Mərakeş Kralının daimi iqamətgahı, habelə dövlətin ali orqanları burada yerləşir. Paytaxtda turistləri cəlb edən tarixi abidələr və muzeylər çoxdur: bünövrəsi 1195-ci ildə qoyulmuş, minarəsinin hündürlüyü 69 metr olan Həsən məscidi, Arxeologiya Muzeyi, Mərakeş İncəsənət Muzeyi və s. Rabat özündə həm qədimlik, həm də müasirlik elementlərini qoruyub saxlayır.