İşğal dövründə Ermənistan tərəfindən Qarabağda çoxlu sayda mina sahələri yaradılıb. Vətən müharibəsindən sonra işğaldan azad edilmiş ərazilərin minalardan, partlamamış hərbi sursatlardan təmizlənməsi istiqamətində Agentliyin qarşısında yeni vəzifələr durur.

AZƏRTAC xəbər verir ki, bunu Azərbaycan Respublikasının Minatəmizləmə Agentliyinin (ANAMA) yeni loqosunun təqdimat mərasimində qurumun İdarə Heyətinin sədri Vüqar Süleymanov deyib.

ANAMA-nın inkişaf etdiyini, maddi-texniki bazasının genişləndirildiyini söyləyən qurumun rəhbəri bildirib ki, bu gün azad edilən ərazilərdə minaların təmizlənməsinə ən innovativ avadanlıqlar cəlb edilib.