Mayın 1-də Azərbaycan Milli Elmlər Akademiyasının (AMEA) Ümumi yığıncağının “Görkəmli dövlət xadimi Heydər Əliyev: lider, zaman və müasirlik” mövzusunda xüsusi iclası keçirilib.

AZƏRTAC xəbər verir ki, əvvəlcə tədbir iştirakçıları Fəxri xiyabanda müasir Azərbaycan dövlətinin qurucusu, Ümummilli Lider Heydər Əliyevin və görkəmli oftalmoloq-alim, akademik Zərifə Əliyevanın xatirəsini anıb, məzarları önünə tər çiçəklər düzüblər.

AMEA-nın əsas binasında keçirilən yığıncaqdan öncə Ulu Öndər Heydər Əliyevin həyat və fəaliyyətini əks etdirən nəşrlərdən və rəsm əsərlərindən ibarət sərgiyə baxış keçirilib.

Tədbirdə “Heydər Əliyevin müstəqil dövlətçilik idealları və müasir dövr” mövzusunda giriş nitqi ilə çıxış edən AMEA-nın prezidenti akademik İsa Həbibbəyli Ümumi yığıncağın Ulu Öndərin anadan olmasının 100 illik yubileyinə həsr olunduğunu söyləyib. Prezident İlham Əliyevin “Azərbaycan Respublikasında 2023-cü ilin “Heydər Əliyev İli” elan edilməsi haqqında” və “Azərbaycan Respublikasında 2023-cü ilin “Heydər Əliyev İli” elan edilməsi ilə bağlı Tədbirlər Planı”nın təsdiq edilməsi haqqında” sərəncamlarını xatırladan akademik AMEA Rəyasət Heyəti tərəfindən bir sıra mühüm tədbirlərin, elmi konfransların keçirildiyini diqqətə çatdırıb.

AMEA prezidenti bildirib ki, Azərbaycanın dövlətçilik tarixində dahi şəxsiyyət Heydər Əliyevin müstəsna yeri var. Ölkəmiz bütün sahələrdə sürətli inkişafa məhz bu müdrik siyasi xadimin böyük səyləri sayəsində müvəffəq olub. Görkəmli dövlət xadimi Heydər Əliyev əbədiyyət qazanmış Ümummilli Lider kimi müstəqil dövlətçilik idealları və dərsləri ilə həm xalqının qəlbində, həm də Azərbaycan Respublikasının inkişafının hər addımında yaşamaqda davam edir.

“Heydər Əliyev xalqına və ölkəsinə etibarlı dostlar və strateji müttəfiqlər qazandırmağın dəqiq formullarını kəşf etmiş dahi şəxsiyyətdir. Çoxəsrlik tarixi ənənələrə malik olan Azərbaycan-Türkiyə münasibətləri Heydər Əliyevin “Bir millət – iki dövlət” düsturu ilə möhtəşəm birlik və həmrəylik səviyyəsinə yüksəlmişdir. Bu gün hərtərəfli şəkildə inkişaf etməkdə olan türk dövlətləri birliyi “Bir millət – iki dövlət” düsturunun böyük strateji imkanlara malik olduğunu nümayiş etdirir”, - deyə AMEA rəhbəri qeyd edib.

Türkiyə Elmlər Akademiyasının prezidenti professor Müzəffər Şəkər “Azərbaycan-Türkiyə birliyi və həmrəyliyi: tarix və müasirlik” mövzusunda məruzə ilə çıxış edib. O bildirib ki, dahi lider Heydər Əliyevin Azərbaycanın siyasi və ictimai həyatındakı xidmətləri misilsiz olub və onun uzaqgörənliyi, liderliyi və xalqına sarsılmaz sədaqəti həmişə minnətdarlıqla xatırlanacaq. Azərbaycan-Türkiyə dostluğu çoxəsrlik ortaq dilə, tarixə və mədəniyyətə əsaslanır və bu gün ölkələrimiz bir çox sahələrdə möhkəm strateji tərəfdaşlığa malikdir.

Tədbirdə “Bir millət – iki dövlət” strategiyası: Mustafa Kamal Atatürkdən Heydər Əliyevə”, “Heydər Əliyevin dövlətçilik təlimində azərbaycançılıq ideologiyası”, “Görkəmli dövlət xadimi Heydər Əliyev və Gürcüstan”, “Heydər Əliyevin Şərq siyasətində türk dünyası”, “Heydər Əliyevin idealları və müasir gənclik” və digər mövzularda məruzələr dinlənilib.

Ümumi yığıncaqda, Elm və təhsil naziri Emin Əmrullayev, eləcə də Türkiyə, Özbəkistan, Gürcüstan Elmlər akademiyalarının, Atatürk Kültür, Dil və Tarix Yüksək Qurumunun, Asiya Akademiyaları və Elmi Cəmiyyətləri Assosiasiyasının nümayəndələri, Milli Məclisin deputatları iştirak ediblər.