Karantin tədbirləri yumşaldıqca qaydalar daha da sərtləşdirilməlidir.

AZƏRTAC xəbər verir ki, bunu Nazirlər Kabineti yanında Operativ Qərargahın mətbuat konfransında Tibbi Ərazi Bölmələrini İdarəetmə Birliyinin (TƏBİB) İdarə Heyəti yanında tibbi-elmi komitənin sədri Akif Qurbanov deyib.

Onun sözlərinə görə, əvvəlki vaxtlara nisbətən ölkədə yoluxma sayı kifayət qədər azalıb: “Ancaq bu, bizi arxayın salmamalıdır. Daha yumşaq karantin rejiminə yavaş-yavaş keçilir”.

Akif Qurbanov, həmçinin bildirib ki, payız-qış mövsümü gəldiyindən bütün respirator infeksiyalar aktivləşmiş olacaq: “Hazırda dövlət səviyyəsində qrip əleyhinə vaksinlərin alınmasına hazırlıq gedir. Yaxın 2-3 ay ərzində vaksinlərin ölkəyə gətirilməsi təmin ediləcək. Hər kəs bir şeyi nəzərdə saxlamalıdır ki, qoruyucu tədbirləri lazımi şəkildə icra etmək vacibdir”.