Martın 15-də Milli Azərbaycan Tarixi Muzeyində görkəmli tarixçi-alim, akademik İqrar Əliyevin anadan olmasının 100 illiyinə həsr edilmiş tədbir keçirilib.

AZƏRTAC xəbər verir ki, tədbirdə muzeyin direktoru akademik Nailə Vəlixanlı alimin həyat və yaradıcılığından danışıb.

Muzeyin direktoru qeyd edib ki, İqrar Əliyev beynəlxalq forumlarda Azərbaycan elmini dəfələrlə təmsil edib. O, 1978-2004-cü illərdə Tarix İnstitutunun direktoru olub. Akademik İ. Əliyev Azərbaycanda tarix elminin inkişafındakı xidmətlərinə görə “Şöhrət” ordeni ilə təltif edilib.

Diqqətə çatdırılıb ki, İ. Əliyev Azərbaycan tarixşünaslığında ilk dəfə olaraq Midiya tarixini tədqiq edib. O, Azərbaycanda qədim dövrlər tarixi üzrə ilk elmlər doktoru olub. Üçcildlik “Azərbaycan tarixi”nin əsas müəlliflərindən biri və redaktorlarındandır. Yeddicildlik “Azərbaycan tarixi”nin isə Baş Redaksiya Şurasının üzvü, həmçinin I cildin əsas müəlliflərindən biri və məsul redaktoru olub.

Sonra tarix üzrə fəlsəfə doktoru Qoşqar Qoşqarov və başqaları akademik İ. Əliyevin Azərbaycan elminə verdiyi töhfələrdən danışıb, onunla bağlı xatirələrini bölüşüblər.

Tədbirdə Nigar Maksvellin akademik İqrar Əliyevə həsr etdiyi “Rojdyonnıy pobejdat” kitabının təqdimatı olub.