Ahıllar evinin sakinləri Bakıda keçiriləcək “Gimnastika hamı üçün” növü üzrə üçüncü beynəlxalq “Challenge” turnirinə hazırlıqlarını davam etdirirlər.

AZƏRTAC xəbər verir ki, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin Ahıl şəxslər üçün sosial xidmət müəssisəsinin yarışda iştirak edəcək sakinləri Rəna Manafovanın rəhbərliyi ilə intensiv məşqlər keçirlər.

Onlar məşq zamanı müxtəlif rəqslər, fləşmob çıxışları və sadə akrobatik hərəkətlər icra ediblər.

Məşqçi R.Manafova bu layihənin bir parçası olduğu üçün qürur hissi keçirdiyini bildirib: “İdman yaşa baxmır. İnsanlar yaşından, fiziki durumundan asılı olmayaraq, idmanla məşğul ola bilərlər. Bu, ahıllarımızın hazırlaşdığı sayca üçüncü turnirdir. Bütün yarışlara yüksək səviyyədə hazırlıq görürlər. Hətta, onların fanatları da var. Həmin insanlar səbirsizliklə bizim ahıllarımızın çıxışını gözləyirlər”.

SSRİ idman ustası proqramların hər il çətinləşdiyini söyləyib: “İlk turnirdəki proqramımız nisbətən daha asan idi. Lakin növbəti yarışlarımızda fərqli musiqilərdən istifadə etdik və daha çətin hərəkətlər nümayiş etdirdik”.

“Gimnastika hamı üçün” növü üzrə komandanın 79 yaşlı üzvü Validə Həsənova isə belə yarışlarda iştirak etməyin əhvali-ruhiyyəsini yüksəltdiyini vurğulayıb: “Mən ötən il də bu turnirə qatılmışdım. O zaman da çox yaxşı hazırlıq keçmişdik. Gələn il 80 yaşım olacaq. Amma özümə söz vermişəm ki, növbəti illərdə də bu turnirdə iştirak edəcəyəm. Biz Rəna xanımın olmadığı günlərdə belə məşqlər edirik. Mən futbol da, voleybol da oynayıram. Çünki idmanla məşğul olmaq enerjimi artırır, özümü daha gümrah və pozitiv hiss etməyimə səbəb olur”.

Xatırladaq ki, iyunun 28-29-da Dənizkənarı Milli Parkda təşkil olunacaq “Challenge”də 5 müxtəlif ölkənin 48 komandası yer alacaq. İştirakçılar iki yaş kateqoriyası (50 yaşdan aşağı və 50 yaşdan yuxarı) üzrə proqramlarda çıxış edəcəklər.

Tədbir ustad dərsləri, komandaların rəngarəng çıxışları və əyləncə proqramları ilə yadda qalacaq.

Qeyd edək ki, bu layihənin məqsədi ahıl şəxslərin fiziki aktivliyini artırmaq, onların sosial həyata inteqrasiyasını dəstəkləmək və sağlam həyat tərzini təşviq etməkdir.