Sentyabrın 9-da Dənizkənarı Milli Parkda Azərbaycan Gimnastika Federasiyasının (AGF) yenidən qurulmasının 20 illiyinə həsr olunmuş “Gimnastika hamı üçün” növü üzrə festival keçirilib.
×
Sentyabrın 9-da Dənizkənarı Milli Parkda Azərbaycan Gimnastika Federasiyasının (AGF) yenidən qurulmasının 20 illiyinə həsr olunmuş “Gimnastika hamı üçün” növü üzrə festival keçirilib.
AZƏRTAC xəbər verir ki, əvvəlcə festival iştirakçıları “Dəniz Mall”un qarşısından Azərbaycan Dövlət Kukla Teatrınadək yürüş ediblər.
Sonra komandaların paradı olub və ardınca Azərbaycan Respublikasının Dövlət Himni səsləndirilib.
Festivalın açılış mərasimində çıxış edən Gənclər və İdman Nazirliyinin İdman şöbəsinin müdiri Elnur Məmmədov festivalın əhəmiyyətini yüksək qiymətləndirib, ölkəmizdə idmana göstərilən dövlət qayğısından danışıb.
Bildirib ki, festivalda 23 komanda gücünü sınayır. “Gimnastika hamı üçün” növündə yaş məhdudiyyəti yoxdur və xüsusi bacarığa ehtiyac duyulmur. Gimnastikanın bu növü ilə uşaqlar, gənclər, həmçinin ailələr də məşğul ola bilər.
AGF-in nümayəndəsi Mehman Əliyev federasiya adından iştirakçıları və festival iştirakçılarını salamlayıb. Vurğulayıb ki, hazırda ölkəmizdə AGF tərəfindən gimnastikanın 9 növü inkişaf etdirilir. Həmin növlərdən biri də “Gimnastika hamı üçün”dür. Bu növ digərlərindən fərqlənir. Belə ki, “Gimnastika hamı üçün” yarış növü deyil. Bu növ ölkəmizdə 2015-ci ildən inkişaf etdirilir və Azərbaycanda yetərincə sevilir.
Tədbirdə bu növ üzrə yığma komandanın üzvləri, “Ocaq Sport” klubunun təmsilçiləri ilə yanaşı, respublikamızın bölgələrindən idmançılar da iştirak ediblər.
Festivalda musiqi sədaları altında müxtəlif çıxışlar nümayiş olunub.
Sonda fərqlənən komandalar mükafatlandırılıb.
Tədbirin məqsədi əhali arasında gimnastika idman növünün təbliği, sağlam həyat tərzinə çağırış, asudə vaxtın səmərəli təşkilidir.
Festival paytaxt sakinləri tərəfindən böyük coşqu ilə qarşılanıb