Bu gün Binəqədi rayonunun ərazisində davam etdirilən ağacəkmə kampaniyası Azərbaycan ekoloqlarının cəmiyyətə etdiyi çağırışa verilən cavabdır. Ayrı-ayrı insanların və təşkilatların bu çağırışa həvəslə qoşulması onu göstərir ki, cəmiyyətimiz ekoloji tarazlığın qorunması işinə nə dərəcədə həssaslıqla yanaşır.

AZƏRTAC xəbər verir ki, bu fikirləri noyabrın 27-də Binəqədi rayonunun Xocəsən qəsəbəsində keçirilən növbəti ağacəkmə aksiyasında iştirak edən ekologiya və təbii sərvətlər naziri Muxtar Babayev deyib.

Bu gün digər qurumların iştirakı ilə növbəti dəfə genişmiqyaslı ağacəkmə tədbiri keçirilib

IDEA İctimai Birliyi, Ekologiya və Təbii Sərvətlər Nazirliyinin birgə təşkilatçılığı ilə həyata keçirilən “Yaşıl Marafon” ağacəkmə kampaniyasına digər qurumların əməkdaşları da qoşulub.

“Yaşıl marafon”da Ekologiya və Təbii Sərvətlər və Rəqəmsal İnkişaf və Nəqliyyat nazirlikləri, Dövlət Gömrük Komitəsi, Diasporla İş üzrə Dövlət Komitəsi rəsmilərinin, Binəqədi Rayon İcra Hakimiyyəti əməkdaşlarının və Azərbaycan Könüllü Təşkilatları İttifaqına üzv könüllülərin iştirak etdiyi aksiya zamanı Bakının Xocəsən qəsəbəsinin 3 hektar ərazisində Abşeron yarımadasının iqliminə uyğun 2500-dən çox müxtəlif cinsli ağac əkilib.

Kampaniyaya qatılan Dövlət Diaspor Komitəsinin sədri Fuad Muradov bu cür tədbirlər respublikada ekoloji vəziyyətin yaxşılaşdırılmasına xidmət etdiyi kimi, həm də vətəndaş həmrəyliyinin ifadəsidir. Tədbirə Niderlandda yaşayan azərbaycanlıların diaspor təşkilatı nümayəndələrinin də qatıldığını bildirən komitə sədri fikrini belə davam etdirib: “Vətəndaş birliyi milli dəyərlərin qorunması işində başlıca amildir. Bugünkü tədbirin rəmzi mənalarından biri də məhz bundan ibarətdir.

Ekologiya və Təbii Sərvətlər Nazirliyi AZƏRTAC vasitəsilə ağacəkmə kampaniyasına yüksək fəallıqla qoşulan bütün tərəfdaşlara, dövlət və özəl qurumlara, media və ictimaiyyət nümayəndələrinə öz təşəkkürünü çatdırıb.