Noyabrın 27-də Azərbaycan Dövlət Pedaqoji Universitetində (ADPU) Türkiyənin Ali Təhsilin Keyfiyyəti Şurası (YÖKAK), Təhsildə Keyfiyyət Təminatı Agentliyi (TKTA), Türkiyənin Sakarya və Çankaya universitetlərinin birgə təşkilatçılığı ilə Ali Təhsildə Keyfiyyət üzrə Beynəlxalq Konfransın (ICQH) və Beynəlxalq Müəllim Hazırlığı Konfransının (ITEC) açılış mərasimi keçirilib.

AZƏRTAC xəbər verir ki, açılış mərasimində Türkiyə və Azərbaycan tərəfdən koordinatorlar - Sakarya Universitetinin professoru Aytekin İşman və ADPU-nun tədris işləri üzrə prorektoru dosent Eldar Aslanov konfranslara hazırlıq prosesi barədə ətraflı məlumat veriblər. Qeyd edilib ki, iki gün davam edəcək Ali Təhsildə Keyfiyyət üzrə Beynəlxalq Konfransa 210-dan çox, Beynəlxalq Müəllim Hazırlığı Konfransına isə 150-dən çox elmi məqalə və tezis təqdim edilib.

ADPU-nun rektoru professor Cəfər Cəfərov ali təhsildə keyfiyyətin yüksəldilməsinin qlobal müzakirələrin əsas mövzularından biri olduğunu söyləyib. O bildirib ki, beynəlxalq standartlara uyğun akkreditasiya mexanizmlərinin tətbiqi ali təhsil sistemində şəffaflığı və məsuliyyəti kifayət qədər artırıb. Rəqəmsal idarəetmə, təhsil və təlim resurslarının modernləşdirilməsi ali təhsilin əlçatanlığını və effektivliyini yüksəldib.

Rektor vurğulayıb ki, müəllim hazırlığı, kadr inkişafı, kurikulum yenilənməsi və universitetlərin beynəlxalq reytinq sistemlərinə inteqrasiyası üzrə genişmiqyaslı proqramlar artıq öz nəticələrini göstərməkdədir. Bu islahatlar ölkəmizin ali təhsil sahəsində qlobal mühitə çevik inteqrasiyasını təmin edir.

Cəfər Cəfərov diqqətə çatdırıb ki, müasir dövrün tələblərinə cavab verən, geniş səriştələrə malik, pedaqoji təfəkkürü inkişaf etmiş müəllimlərin yetişdirilməsi olmadan təhsildə keyfiyyətin davamlı təmin edilməsi mümkün deyil və bu baxımdan Beynəlxalq Müəllim Hazırlığı Konfransı xüsusi əhəmiyyət daşıyır.

Türkiyənin Çankaya Universitetinin rektoru Hadi Hakan Maraş və Sakarya Universitetinin rektoru Hamza Al, YÖKAK-ın sədri professor Ümit Kocabıçak və TKTA-nın İdarə Heyətinin sədri Tural Əhmədov çıxışlarında konfransın təkcə elmi müzakirə platforması deyil, həm də iki ölkənin ali təhsil sistemləri arasında bilik və təcrübə mübadiləsinin strateji mərhələsi olduğunu qeyd ediblər. Çıxışlarda konfransların ali təhsil sistemi üçün yeni əməkdaşlıq perspektivləri açacağına və birgə fəaliyyətlər üçün güclü stimul verəcəyinə əminlik ifadə olunub.

Açılış nitqlərindən sonra ADPU-nun biologiya müəllimliyi ixtisasının son kurs tələbəsi Gülay İmanzadənin pianoda ifası təqdim edilib.

Daha sonra plenar iclasın açılış məruzələri dinlənilib. ADPU-nun rektoru Cəfər Cəfərov “Müasir müəllim hazırlığının keyfiyyət göstəriciləri”, YÖKAK sədri Ümit Kocabıçak “Ali təhsildə akkreditasiyaların önəmi və süni intellektin təsiri”, TKTA-nın İdarə Heyətinin sədri Tural Əhmədov isə “Ali təhsil müəssisələrinin institusional və proqram akkreditasiyası üzrə çağırışlar və gözləntilər” mövzusunda geniş məruzələrlə çıxış ediblər.

Plenar iclasdan sonra Ali Təhsildə Keyfiyyət üzrə Beynəlxalq Konfrans və Beynəlxalq Müəllim Hazırlığı Konfransı öz işini 18 bölmədə müzakirələrlə davam etdirib.