Martın 14-də ADA Universiteti, ADA Universiteti Fondu və “Coca-Cola Azərbaycan”ın birgə təşkilatçılığı ilə 11-ci Bahar Gənclik Festivalı keçirilib.

AZƏRTAC xəbər verir ki, festival Novruzun gəlişini qeyd etmək, milli dəyərləri yaşatmaq, yerli və xarici tələbələr arasında bayram əhvali-ruhiyyəsini bölüşmək məqsədi daşıyıb.

Tədbirdə ADA Universitetinin tələbə, məzun və müəllim heyəti, tərəfdaş qurumların əməkdaşları və mətbuat nümayəndələri iştirak ediblər. Festivalın əsas məqamlarından biri Azərbaycanın Xalq artisti Zülfiyyə Xanbabayevanın canlı ifası olub. Eyni zamanda, dicey Çinanın musiqi performansı, milli rəqslər və Novruz adətlərini əks etdirən xüsusi nümayişlər festival iştirakçılarına bayram ovqatı bəxş edib.

ADA Universitetinin tələbə qəbulu və xidmətləri üzrə prorektoru Günay Ziyadova artıq ənənəyə çevrilən və bu il 11-cisi keçirilən bahar festivalının təşkilində daim ADA-nın yanında olaraq, dəstək göstərən “Coca-Cola Azərbaycan”a təşəkkürünü bildirib. Əlavə edib ki, Azərbaycan xalqının milli kimliyində və mədəni irsində xüsusi əhəmiyyəti olan Novruz adətləri ADA icmasınının üzvləri arasında da həmrəyliyi möhkəmləndirir.

“Coca-Cola Azərbaycan”ın baş direktoru Rəna Məmmədova qeyd edib ki, şirkət uzun illərdən bəri Bahar Gənclik Festivalının tərəfdaşı qismində birlik və paylaşımı əks etdirən Novruz dəyərlərinin qorunub saxlanılmasına töhfə verir.

“Azərxalça”nın İdarə Heyətinin sədri Emin Məmmədov çıxışında vurğulayıb ki, Novruz ənənələri və xalçaçılıq bir-biri ilə sıx bağlıdır, çünki hər ikisi xalqımızın mədəni irsini yaşadır.

Hazırda ölkəmizdə səfərdə olan İtaliyanın Turin Universitetinin rektoru Stefano Korqnati ADA Universitetində görüşü çərçivəsində festivalda iştirak edib və Novruz təəssüratlarını bölüşüb: "Novruzun zəngin mədəni ənənələrini ADA Universitetinin dinamik mühitində yaşamaq mənim üçün unudulmaz təcrübə oldu. Bunun Azərbaycan xalqının zəngin mədəniyyətini və dəyərlərini yaşatmaqla yanaşı, həm də birlik və həmrəyliyi təşviq etdiyini aydın şəkildə hiss etdim”.

Festival çərçivəsində Novruzun əsas simvollarından olan Kosa və Keçəl müxtəlif səhnəciklərlə tədbirə rəng qatıb. Eyni zamanda, iştirakçılar üçün milli təamlardan ibarət Novruz süfrəsi təqdim olunub.