Abşeron Milli Parkının yaradılmasının 17-ci ildönümü münasibətilə fevralın 8-də Azərbaycan Dövlət Rəssamlıq Akademiyası ilə birgə parkda açıq havada “Şahdili peyzajı” adlı yaradıcılıq günü təşkil edilib.

AZƏRTAC xəbər verir ki, Rəssamlıq Akademiyasının müəllim və tələbələrinin rəsm əsərləri, həvəskar və peşəkar fotoqrafların fotoları milli parkda nümayiş etdirilir, gənc rəssamlara parkın təbiətini əks etdirən natura rəsmlərini çəkmələri, fotoqraflara təbiət mənzərələrini, ornitofauna növlərini lentə almaları üçün şərait yaradılıb.

Abşeron Milli Parkında “Şahdili peyzajı” adlı yaradıcılıq gününün təşkilində məqsəd təbii varlıqları yaradıcı şəxslərin duyğularında təqdim etmək, milli parkın mövcud təbiət komplekslərinin rəssamların və fotoqrafların yaradıcı təxəyyülü ilə geniş kütləyə çatdırılmasına dəstək olmaqdır.

“Şahdili peyzajı” yaradıcılıq günündə parka gələn ziyarətçilər, eləcə də tədbirdə iştirak edən Azərbaycan Könüllü Təşkilatları İttifaqına üzv könüllülər rəngarəng məzmunlu, rəsm və fotonümunələrindən ibarət sərgi ilə tanış olub, müxtəlif quş növlərini, xüsusilə də flaminqoları müşahidə ediblər.

Eyni zamanda, insanlara sağlam həyat tərzini aşılamaq, ekoloji təmiz nəqliyyat növlərindən istifadəni təşviq etmək, nəqliyyat vasitələrindən atmosferə atılan zərərli maddələrin azaldılmasına töhfə vermək məqsədilə milli parkda veloyürüş təşkil edilib.

Bioloji Müxtəlifliyin Qorunması Xidmətinin rəisi Firuddin Əliyev kütləvi informasiya vasitələrinə açıqlamasında bildirib ki, 2005-ci ildə yaradılan Abşeron Milli Parkının təsis edilməsində məqsəd Abşeron yarımadasının ərazisində yerləşən flora və fauna növlərinin qorunub saxlanılmasıdır. Çünki milli parkın ərazisində “Qırmızı kitab”a düşən həm heyvan, həm də bitki növləri mövcuddur. Bundan əlavə, səhra və yarımsəhra iqliminə malik olan milli parkda kifayət qədər flora və fauna növləri var. Burada turistik baxımından çox maraqlı olan ərazilər mövcud olduğundan milli parkın ərazisində ekoturlar da təşkil etmək mümkündür. Həmçinin milli park ərazisində flaminqoların müşahidəsini - “birdwatching” də təşkil etmək imkanı var.

Xidmət rəisinin sözlərinə görə, Abşeron Milli Parkı turistlər üçün aktual olan yerlərdən biridir. Paytaxta ən yaxın yerləşən milli park olduğundan buraya diqqət daha çoxdur. Ərazi baxımından ən kiçik milli park olmasına baxmayaraq, digər milli parklar qədər həm flora, həm də fauna növləri mövcuddur. Bunların qorunub saxlanılması qismində Ekologiya və Təbii Sərvətlər Nazirliyi tərəfindən mütəmadi olaraq tədbirlər həyata keçirilir.

Milli parkı beşinci dəfə ziyarət edən ekokönüllü Murad Qurbanov bunu paytaxta ən yaxın milli park olması ilə əlaqələndirib. O, Abşeron yarımadasının cənub-şərq qurtaracağında yerləşən Abşeron Milli Parkını digərlərindən fərqləndirən əsas xüsusiyyətin Azərbaycan xəritəsindəki “qartalın dimdiyi” olan Şah Dili burnunun bu əraziyə düşməsi olduğunu deyib: “Bundan əlavə, burada flaminqolar da var. Tədbir çərçivəsində flaminqoları müşahidə etmək imkanı əldə etdik. Həmçinin veloyürüş də təşkil olundu”.

Azərbaycan Dövlət Rəssamlıq Akademiyasının rəngkarlıq və kompozisiya kafedrasının müəllimi Fəxri Musazadə gələcəkdə belə təbirlərin davamlı olmasını arzulayıb və ziyarətçilərə burada olan gözəlliyi sənətin dili ilə çatdırılmasının daha təsirli olacağını qeyd edib.