Təcrübəmizdə ürək çatışmazlığı xəstələrinə əsasən 50-65 yaş qrupunda daha çox rast gəlirik. Xəstəlikdə cavanlaşma da müşahidə olunur. Təəssüf ki son dönəmlərdə gənc yaşlarda ürək çatışmazlığından əziyyət çəkənlərin sayında artım qeydə alınır ki, bunun da müxtəlif səbəbləri var. Cavan yaşlarda kəskin infarkt keçirmə, ürək-damar tıxanmasının olması halları, o cümlədən koronavirus səbəbindən gənc yaşlarda kəskin ürək çatışmazlığından əziyyət çəkən xəstələrin sayı artıb.

Bunu AZƏRTAC-a müsahibəsində Azərbaycan Kardiologiya Cəmiyyətinin ürək çatışmazlığı işçi qrupunun sədri Aysel İslamlı deyib.

Uşaqlarda rast gəlinən ürək çatışmazlığından danışan kardioloq böyüklərlə müqayisədə bunun səbəbinin və müalicə taktikasının fərqli olduğunu qeyd edib: “Uşaqlarda anadangəlmə ürək qüsurları ilə bağlı ürək çatışmazlığına daha çox rast gəlinir. Bundan əlavə, keçirilən viral infeksiya ilə əlaqədar ürək çatışmazlığının yaranması halları da qeydə alınır”.

A.İslamlı 40 yaşdan yuxarı kişilərə və 45 yaşdan yuxarı qadınlara ildə bir dəfə kardioloji müayinədən keçməyi tövsiyə edib: “Pilləkən çıxarkən, gəzərkən təngnəfəslik şikayəti başlayıbsa, mütləq kardioloqa müraciət etsinlər, bazal müayinədən keçsinlər”.