Fevralın 17-də ikinci “Yüksəliş” müsabiqəsinin qeydiyyat mərhələsinin başlanması ilə bağlı mətbuat konfransı təşkil olunub.

AZƏRTAC xəbər verir ki, mətbuat konfransında “Yüksəliş” müsabiqəsinin İşçi Qrupunun rəhbəri Fərhad Hacıyev müsabiqənin qeydiyyat qaydaları, keçirilməsi haqqında danışıb. Qeyd edib ki, 21–51 yaş arasında olan, ali təhsilli, ən azı 2 il idarəçilik təcrübəsinə malik Azərbaycan Respublikasının vətəndaşları qeydiyyatdan keçərək müsabiqədə iştirak edə bilərlər. Müsabiqəyə “yukselish.az” saytı vasitəsilə həyata keçirilən qeydiyyat martın 31-i saat 18:00-dək aparılacaq. Müsabiqə qeydiyyat, onlayn, əyani, yarımfinal və finaldan ibarət olmaqla 5 mərhələdən ibarətdir.

Fərhad Hacıyev diqqətə çatdırıb ki, bu il üçün test imtahanlarında bəzi yeniliklər olacaq. Test imtahanlarında namizədlərin informasiya texnologiyaları sahəsində bilikləri yoxlanılacaq. Sualların məzmununda da dəyişiklik ediləcək. Əvvəl təkcə ölkəyə aid suallar verilirdisə, bu il dünyada baş verən hadisələrlə bağlı suallar da olacaq. Müsabiqənin əyani və qabiliyyət imtahanı mərhələsində beynəlxalq təcrübə nəzərə alınacaq.

İşçi Qrupun rəhbəri bildirib ki, builki müsabiqə üçün 10 mindən artıq müraciətin olacağı nəzərdə tutulub. Müsabiqənin avqust ayında bitməsi planlaşdırılır. “Yüksəliş” müsabiqəsi ilə bağlı sınaq imtahanları da təşkil olunacaq. Sınaq imtahanları bütün mərhələləri əhatə edəcək. Hər mərhələdən öncə təşkil olunan sınaq imtahanı istər vaxt baxımından, istərsə də sualların tərtibi baxımından real imtahanlardan fərqlənməyəcək.

Fərhad Hacıyev vurğulayıb ki, “Yüksəliş” müsabiqəsinin keçənilki ekspert və qalibləri builki müsabiqəyə qoşula bilməzlər.

Müsabiqənin yekunlarına əsasən, “Yüksəliş” qalibi elan olunan 20 iştirakçı idarəçi rəhbərlərin iştirakı ilə birillik mentorluq proqramına qoşulmaq və fərdi inkişaf üçün 20 min manat pul mükafatı qazanmaq imkanı əldə edəcək.

Qeyd edək ki, “Yüksəliş” müsabiqəsi Azərbaycan Respublikasının Prezidenti İlham Əliyevin 2019-cu il iyulun 26-da imzaladığı Sərəncamla intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub.