“Yüksəliş” müsabiqəsinin əyani mərhələsinin imtahanları Bakı şəhərində 5 imtahan mərkəzində keçirilir. Əyani mərhələnin imtahanında müsabiqənin əvvəlki mərhələlərini uğurla keçmiş 1202 nəfər iştirak etmək hüququ qazanıb.

AZƏRTAC xəbər verir ki, bunu əyani mərhələnin imtahanını izləyən jurnalistlərə açıqlamasında “Yüksəliş” müsabiqəsinin İşçi qrupunun rəhbəri Fərhad Hacıyev deyib. O bildirib ki, əyani mərhələ “Qabiliyyət üzrə yoxlama” və “İdarəetmə bacarıqları” olmaqla iki imtahandan ibarətdir.

Qeyd edək ki, “Yüksəliş” müsabiqəsi Azərbaycan Respublikasının Prezidenti İlham Əliyevin 2019-cu il 26 iyul tarixli Sərəncamına əsasən, intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub.