Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə “Ümumrespublika Yaşıllaşdırma Marafonu” (“Yaşıl Marafon”) çərçivəsində əhaliyə ağac tinglərinin paylanması kampaniyasına start verilib.

AZƏRTAC xəbər verir ki, aprelin 2-də IDEA İctimai Birliyi, Ekologiya və Təbii Sərvətlər Nazirliyi və BRAVO marketlər şəbəkəsinin birgə təşkilatçılığı ilə “Koroğlu” metro stansiyasının yaxınlığında yerləşən BRAVO hipermarketini ziyarət edən alıcılara ağac tingləri hədiyyə edilib.

Əhalinin ağacəkmə hərəkatında fəal iştirakına nail olmaq, təbiətə qayğı göstərilməsini təşviq etmək və əkin prosesinə qoşulmalarını dəstəkləmək məqsədilə kampaniyanın 3 gün müddətində davam etdirilməsi planlaşdırılıb. Alıcıların böyük marağına səbəb olan kampaniyanın növbəti günlər ərzində Əhmədli qəsəbəsi və "20 Yanvar" metro stansiyası yaxınlığında yerləşən BRAVO hipermarketlərində də keçirilməsi və ziyarətçilərə müxtəlif növ meyvə və həmişəyaşıl ağac tinglərinin paylanması nəzərdə tutulub.

Həmin tədbir zamanı tinglərin paylanması ilə yanaşı, vətəndaşlara ağacların düzgün əkilməsi, suvarılması və qulluq göstərilməsi qaydaları da izah olunub.

Tədbirin yekununda gənc könüllülərin iştirakı ilə ağacəkmə aksiyası keçirilib.

Qeyd edək ki, “Yaşıl Marafon” layihəsinin əsas məqsədi yaşıllıq sahələrini artırmaq, ağac əkilməsini təşviq edərək ətraf mühitin mühafizəsinə, o cümlədən ölkəmizin flora biomüxtəlifliyinin artırılmasına, yaşıllıqların qorunması ilə bağlı maarifləndirməyə töhfə verməkdir. Layihə yaz və payız əkin mövsümləri müddətində 1 milyona yaxın ağac əkilməsini və yaşıllıq sahələrinin artırılmasını hədəfləyir.

Layihə tərəfdaşları hər kəsi yaz əkin mövsümünü ətraf mühit naminə dəyərləndirməyə, planetimizin mühafizəsində xüsusi fəallıq göstərməyə, yaşıllaşdırma səylərinə fəal qoşulmağa çağırır.

Gəlin yaşıllaşdıqca gözəlləşən təbiətimizə sahib çıxaq!