Yanvarın 30-da Azərbaycan Milli Xalça Muzeyində Əməkdar rəssam, qobelen ustası Adil Şıxəliyevin “Vətənim mənim” adlı fərdi sərgisinin açılış mərasimi keçirilib.

AZƏRTAC xəbər verir ki, sənətkarın yaradıcılığının 50 illiyi münasibətilə keçirilən sərgidə 30-dək qobelen təqdim edilib.

Tədbirdə çıxış edən Milli Xalça Muzeyinin direktor vəzifəsini müvəqqəti icra edən Mira Məmmədxanova sərgidə Adil Şıxəliyevin keçmişdə və müasir dövrdə ölkəmizin həyatında baş vermiş mühüm tarixi hadisələrə həsr etdiyi “Qarabağdan məktub”, “Zəfər yolu”, “Şuşa” (triptix), “Vətənim mənim”, “Şuşada toy” əsərləri, Azərbaycan xalqının Ümummilli Liderinə ithaf edilən “Heydər Əliyev” portreti, milli ornamentlərlə zənginləşdirilmiş “Köç” qobeleninin sərgiləndiyini bildirib. O, sənətkarın əsərlərinin həm Azərbaycanda, həm də xarici ölkələrdə keçirilən sərgilərdə nümayiş etdirildiyini söyləyib.

Azərbaycan Rəssamlar İttifaqının sədri Fərhad Xəlilov Adil Şıxəliyevlə hələ gənc vaxtlarından tanış olduğunu qeyd edərək, Əməkdar rəssama təbriklərini çatdırıb.

Azərbaycan Respublikasının Xalq rəssamı, Azərbaycan Rəssamlar İttifaqının "Dekorativ-tətbiqi sənət" bölməsinin müdiri, xalçaçı-rəssam Aydın Rəcəbov bu il Adil Şıxəliyevin yaradıcılığının 50 illiyinin qeyd edildiyini, onun ölkəmizin tarixində baş vermiş mühüm mövzulara həsr olunmuş sənət əsərləri hazırladığını və bu əsərlərin hər kəs tərəfindən sevildiyini bildirib.

Tədbirdə çıxış edən Azərbaycan Milli İncəsənət Muzeyinin direktoru, sərginin kuratoru Şirin Məlikova qobelen ustasının bu sərgi üçün xüsusi yeni əsərlər hazırladığını qeyd edib. O, əsərlərin hazırlanması zamanı lentə alınmış kadrlarla filmin ərsəyə gətirildiyini və bu sərgi çərçivəsində təqdim ediləcəyini diqqətə çatdırıb.

Əməkdar rəssam Adil Şıxəliyev sərgidə qobelenləri ilə yanaşı, özünün təbii boyalarla rənglədiyi, onun ideyalarına həyat verən iplər və onların rənglənməsində istifadə edilən bitkilərin təqdim olunduğunu deyib.

Tamaşaçılar sərgidə rəssamın yaradıcılığının mühüm hissəsini təşkil edən Abşeron motivli “Nar bağı”, “Mamırlı daşlar”, “Abşeron”, “Qızıl balıq” kimi əsərlərlə, həmçinin real və mifik heyvanların, gül və ağac təsvirlərinin əks etdirildiyi müxtəlif mövzulu qobelenlərlə tanış olublar. Ziyarətçilər bir çox yerli və xarici sərgilərin iştirakçısı olan, qobelen texnikasının imkanlarından maksimum yararlanaraq “Odlar yurdu” və “Payız çiçəkləri” kimi əsərlər ərsəyə gətirən rəssamın ecazkar yaradıcı dünyasını kəşf ediblər.

Sərgi martın 6-dək davam edəcək.