8 Mart - Beynəlxalq Qadınlar Günü ərəfəsində Azərbaycan Respublikası Vəkillər Kollegiyasının təşkilatçılığı, Ailə, Qadın və Uşaq Problemləri üzrə Dövlət Komitəsinin iştirakı ilə “Vəkillikdə qadınlar: dünən, bu gün və sabah” mövzusunda dəyirmi masa keçirilib.

AZƏRTAC xəbər verir ki, tədbirdə Vəkillər Kollegiyasının sədri Anar Bağırov, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Kollegiyanın rəhbərliyi və 50-dən çox qadın vəkil iştirakı edib.

Dəyirmi masanın əsas məqsədi qadın vəkillərin cəmiyyətdə, o cümlədən həssas qrupların hüquqi yardıma çatımlılığında və məişət zorakılığı qurbanlarının müdafiəsində rolu, ölkəmizdə insan hüquq və azadlıqlarının müdafiəsində qadın vəkillərin bilik və bacarıqlarının təkmilləşdirilməsi, qadın hüquqşünasların vəkilliyə marağının artırılması və Kollegiya ilə Komitənin bu əməkdaşlıq imkanlarının müzakirə edilməsidir.

Dövlət Komitəsinin sədri Bahar Muradova çıxış edərək bildirib ki, tədbirin keçirilməsində məqsəd Azərbaycanda hüquqşünas qadınların cəmiyyətin və dövlətin həyatında iştirakına diqqətin artırılması, vəkillik fəaliyyəti ilə məşğul olan qadınların dünəni, bu günü və sabahı ilə bağlı fikir mübadiləsi aparmaqdır. Vurğulayıb ki, Ailə, Qadın və Uşaq Problemləri üzrə Dövlət Komitəsi ilə Vəkillər Kollegiyası arasında intensiv əməkdaşlıq mövcuddur. 2019-cu ildə BMT-nin Azərbaycan nümayəndəliyi ilə “Zərərçəkmiş qadınlara pulsuz hüquqi yardımın təşkilinə dair” memorandumun imzalanması bu əməkdaşlığın göstəricilərindəndir. Ötən müddətdə Komitə memorandumdan irəli gələn vəzifələri həyata keçirib.

Vəkillik fəaliyyəti ilə məşğul olan qadınların qarşılaşdığı çətinliklər, onların peşə fəaliyyətindəki problemlərlə bağlı fikirləri və Azərbaycanın müvafiq dövlət orqanlarının, o cümlədən Dövlət Komitəsinin və Vəkillər Kollegiyasının müxtəlif istiqamətləri ilə bağlı fikir mübadiləsinin aparılmasının önəmini vurğulayan B.Muradova bildirib ki, bu tədbirin daha bir məqsədi də ictimaiyyətin diqqətini qadınların bu sahədə fəaliyyətinin genişləndirilməsinə yönəltməkdir. Hazırda Azərbaycanda vəkillərin sayı lazım olduğundan azdır. Lakin ölkəmizdə müvafiq orqanlar və Vəkillər Kollegiyası bununla bağlı çoxsaylı tədbirlər həyata keçiriblər. Artıq sön dövrlərdə mövcud çətinliklər tədricən həll edilməkdədir. Bu sahəyə daha çox qadınların cəlb edilməsi və özlərini mütəxəssis kimi sınaqdan keçirməsi üçün tədbirlər həyata keçirilir.

Komitə sədri Azərbaycanın hüquqşünas qadınlarına çağırış edərək onların fəaliyyət seçimi qarşısında qalarkən xüsusilə vəkillik və insanların hüquqlarının məhkəmələrdə müdafiə sahəsini seçmələrinin önəmini qeyd edib: “Cəmiyyətimizdə buna ciddi ehtiyac var. Nəzərə alınmalıdır ki, Komitənin fəaliyyəti ailədaxili problemləri, qadınların, uşaqların hüquqlarının qorunması və təminatı ilə məşğuldur. Həmçinin Vəkillər Kollegiyasına bu cür problemləri olan qadınlar müraciət edən zaman daha çox qadın vəkillərə üstünlük verirlər. Ona görə də Komitə bu sahədəki ehtiyacı həll etmək üçün müvafiq tədbirlər görməyə çalışır. Məhz 8 Mart - Beynəlxalq Qadınlar Günü ərəfəsində belə bir tədbirin keçirilməsinin həm də rəmzi məna kəsb edir. Tədbir Azərbaycanda bu sahədə mövcud problemlərin aradan qaldırılması üçün qanunverici əsasların, həm də müvafiq icra mexanizmlərinin birgə səylərlə təkmilləşməsi işinə mühüm töhfə ola bilər”.

Vəkillər Kollegiyanın sədri Anar Bağırov tədbirin Azərbaycan vəkilliyi üçün əhəmiyyətini vurğulayaraq, bu sahədə gender bərabərliyinin təmin edilməsinin vacibliyindən, görülmüş layihələrdən, qadın vəkillərin müxtəlif sahələrdə bilik və bacarıqlarının artırılmasının zərurətindən, Komitə tərəfindən Kollegiyaya daxil olan sorğuların xüsusi həssaslıqla araşdırılmasından danışıb. Qadınlar arasında vəkilliyə marağın və son dörd ildə qadın vəkillərin sayının üç dəfə artdığını diqqətə çatdıran qeyd edib. Qeyd olunub ki, məişət zorakılığından zərər çəkmiş şəxslərə hüquqi yardım göstərilməsi ilə bağlı 2019-cu il dekabrın 10-da Komitə, Vəkillər Kollegiyası və BMT-nin Azərbaycan nümayəndəliyi arasında imzalanmış memorandumun icrası çərçivəsində məişət zorakılığı qurbanlarına əvəzsiz hüquqi yardım göstərilib.

Tədbirdə Vəkillər Kollegiyasının üzvləri qadın vəkillərin fəaliyyətlərində qarşılaşdığı çətinliklər və onların həlli yolları, müasir dövrdə qadın vəkillərin İKT-dən istifadəsi, o cümlədən qadın vəkillərin təşkilatlanması və birgə fəaliyyəti mövzusunda təqdimatla çıxış edib və müzakirələr aparıblar.

Sonda tədbir iştirakçılarına türk dünyasının ilk qadın vəkili, Şuşada anadan olmuş Sürəyya Ağaoğlunun xatirələrinə həsr edilmiş və Azərbaycanda dərc edilmiş “Bir ömür belə keçdi” kitabı hədiyyə edilib.