Sosial Xidmətlər Agentliyinin dəstəyi ilə hazırlanmış, şəhid və qazilərimiz haqqında məlumatları özündə cəmləşdirən “Unudulmazlar” mobil tətbiqinin ilkin tanıtımı və “Vətən dastanı” filminin təqdimatı olub.

Tədbirdə Sosial Xidmətlər Agentliyinin sədri Vüqar Behbudov, QHT nümayəndələri, qazilər, şəhid ailələrinin üzvləri iştirak ediblər.

Əvvəlcə “Unudulmazlar” mobil tətbiqi təqdim olunub.

AZƏRTAC xəbər verir ki, tədbirdə çıxış edən V.Behbudov bu tədbirin 26 iyun - Azərbaycan Respublikasının Silahlı Qüvvələr Günü ərəfəsində keçirildiyini bildirib və Prezident, Müzəffər Ali Baş Komandan İlham Əliyevin rəhbərliyi ilə qüdrətli Ordumuzun 44 günlük Vətən müharibəsində əldə etdiyi tarixi Zəfərdən bəhs edib. O, rəşadətli Silahlı Qüvvələrimizin xalqımız üçün qürur mənbəyi olduğunu vurğulayıb.

Qeyd edib ki, “Unudulmazlar” mobil tətbiqi də ölkəmizin ərazi bütövlüyünün təmin olunması uğrunda döyüşlərdə şəhidlik zirvəsinə ucalmış qəhrəmanlarımız, bu döyüşlərin qaziləri haqqında ətraflı məlumat əldə etməyə imkan yaradan, onların cəmiyyətə daha yaxından tanıdılmasına xidmət edən yeni layihədir.

Mobil tətbiq rayonlar üzrə də axtarış imkanı verir, qeyd olunan kateqoriyalara aid şəxslər barədə foto, video və bioqrafiya məlumatlarına əlçatanlığı təmin edir.

Agentliyin sədri “Unudulmazlar” mobil tətbiqində haqqında məlumat yerləşdirilən şəxsin döyüş yolu, təltif və medalları barədə də məlumatların yer aldığını qeyd edib. Onun sözlərinə görə, mobil tətbiqdə 2904 şəhid haqqında məlumat əks olunub.

O, həmçinin Sosial Xidmətlər Agentliyinin dəstəyi ilə hazırlanan “Vətən dastanı” filmindən bəhs edib, filmin tarixi Zəfərimizə həsr olunduğunu bildirib.

“Vətən dastanı” filminin prodüseri Fuad Cəfərov filmin ötən əsrin sonlarından başlayaraq erməni təcavüzkarlarının Azərbaycana qarşı baş qaldıran yeni ərazi iddiaları, 30 ilə yaxın müddətdə davam edən işğal faktı və Prezident, Müzəffər Ali Baş Komandan İlham Əliyevin rəhbərliyi ilə yenilməz Ordumuzun əldə etdiyi tarixi Zəfərdən, torpaqlarımızın işğaldan azad edilməsindən bəhs etdiyini diqqətə çatdırıb. Bildirilib ki, filmdə rəşadətli Azərbaycan Ordusunun Vətən müharibəsində uğurlu hərbi əməliyyatları, qəhrəman Vətən övladlarının bu müharibədə keçdikləri şərəfli döyüş yolu əks olunur. Onların yaşadıqları hadisələr, göstərdikləri qəhrəmanlıqlar öz dillərindən təqdim olunur: “Filmdə 11 qazinin timsalında Vətən müharibəsindən bəhs edilir. Çəkilişlər Bakı şəhəri, Saatlı və Cəlilabad rayonlarında aparılıb. Vətən müharibəsi, şəhid və qazilərlə bağlı başqa layihələrin və filmlərin də ərsəyə gətirilməsi nəzərdə tutulub”.

DOST Agentliyinin İdarə Heyətinin sədrinin müavini Seymur Alıyev qazilərə, şəhid ailələrinə dövlət qayğısından danışıb, “Unudulmazlar” layihəsinin və “Vətən dastanı” filminin əhəmiyyətindən bəhs edib.

Sonra “Vətən dastanı” filmi təqdim edilib.