Martın 11-də turizm sahəsində peşə təhsilli üzrə kadr hazırlığının gücləndirilməsi məqsədilə Dövlət Turizm Agentliyi, Təhsil Nazirliyi yanında Peşə Təhsili üzrə Dövlət Agentliyi, Azərbaycan Turizm Bürosu və Azərbaycan Hotel Assosiasiyasının birgə həyata keçirdiyi “Turizm sahəsində dual təhsil proqramı”nın perspektivləri müzakirə olunub.

AZƏRTAC xəbər verir ki, tədbirdə Peşə Təhsili üzrə Dövlət Agentliyinin direktor müavini, direktor vəzifəsini icra edən Ceyhun Kərəmov birgə əməkdaşlığın əhəmiyyətindən, proqramın üstünlüklərindən danışıb. Bildirib ki, sənaye nümayəndələrinin tərəfdaşlığı ilə reallaşdırılan layihənin genişləndirilməsi turizm sahəsində kadr hazırlığı prosesinə töhfə verəcək. 2021-2022-ci tədris ilində peşə təhsili müəssisələrinə ümumilikdə 17 min tələbə qəbul olub. Onların 12 faizi - 2 minə yaxını aşpaz, mehmanxana, inzibatçı, hoteldə konsyerj və digər turizm istiqamətli ixtisaslara üstünlük verib.

Ceyhun Kərəmov vurğulayıb ki, Azərbaycanda turizmin inkişafında peşə təhsilinin rolu danılmazdır: “2015-2019-cu illərdə turizmin inkişafı sürətlə gedirdi. Bu dövrdə ölkəyə 3 milyondan artıq turist gəlmişdi. Lakin pandemiya bu prosesi əsaslı dərəcədə ləngitdi. 2019-cu ilin fevral ayı ilə 2022-ci ilin fevral ayını müqayisə etdikdə turistlərin sayının 60 faiz aşağı düşdüyü müşahidə olunur. Əvvəlki inkişaf sürətinə qayıtmaq, daha da irəliyə addımlamaq üçün bu sahədə təhsilin inkişafına nail olmaq lazımdır”.

Dövlət Turizm Agentliyinin Aparatının rəhbəri Kənan Qasımov hotellərin proqramın həyata keçirilməsində aktiv iştirakının və peşəkar kadr hazırlığında maraqlı olmalarının əhəmiyyətini diqqətə çatdırıb.

“Turizm sahəsində dual təhsil proqramı”nın pilot layihə olaraq həyata keçirildiyini qeyd edən Azərbaycan Turizm Bürosunun Baş icraçı direktoru Florian Zenqstşmid bu sahədə dövlət və özəl sektor əməkdaşlığının vacib amil olduğunu, turizm üzrə mütəxəssislərin hazırlanmasında gələcəkdə də bu kimi layihələrin həyata keçirilməsinin önəmini vurğulayıb.

Tədbir zamanı “Turizm sahəsində dual təhsil proqramı”na Turizm və Sosial Xidmətlər üzrə Bakı Dövlət və Qəbələ Dövlət peşə təhsil mərkəzlərindən aşpaz və turizm sahəsində iaşə üzrə mütəxəssis ixtisaslarında təhsil alan tələbələrin cəlb edildiyi qeyd olunub. İlkin olaraq proqramın Bakı və Qəbələ şəhərlərində yerləşən peşə məktəblərində tətbiq olunmasına baxmayaraq, turizmin inkişaf etdiyi digər regionlar üzrə də genişləndirilməsinin perspektivləri diqqətə çatdırılıb. Həmçinin bildirilib ki, sənaye nümayəndələri ilə birlikdə təcrübə əsaslı biliklərin tələbələrə ötürülməsi, işəgötürənlərin öz kadr ehtiyaclarına uyğun mütəxəssislər hazırlaması, istedadlı tələbələrin potensial bilik və bacarıqlarının real iş yerlərində aşkar edilməsi proqramın əsas məqsədlərindəndir.

Qeyd edək ki, “Turizm sahəsində dual təhsil proqramı” Peşə Təhsili üzrə Dövlət Agentliyi, Dövlət Turizm Agentliyi, Azərbaycan Turizm Bürosu və Azərbaycan Hotel Assosiasiyasının birgə əməkdaşlığı çərçivəsində həyata keçirilir. Cari tədris ilində proqramda iştirak edən tələbələr hotellərdə praktik bacarıqlara yiyələnirlər. Qəbələ Dövlət Peşə Təhsil Mərkəzindən olan tələbələr “Qafqaz Tufandağ Hotel” və “Qafqaz Riverside Hotel”ində təcrübə qazanırlar. Turizm və Sosial Xidmətlər üzrə Bakı Dövlət Peşə Təhsil Mərkəzindən proqrama qatılan tələbələr isə “JW Marriott Absheron Baku Hotel”, “Fairmont Baku Hotel”, “Baku Mariott Hotel Boulevard”, “Hilton Hotel”, “Courtyard by Mariott Baku Hotel” və “The Merchant Baku Hotel”ində praktik məşğələlərə cəlb olunurlar.