Bakıda keçirilən batut gimnastiksı üzrə dünya kuboku yarışında 16 idmançı kişilərin fərdi mübarizəsində ikinci mərhələyə adlayıb.

AZƏRTAC xəbər verir ki, 4 qrupda mübarizə aparan kişi batutçuların yarışında ilk 16 pillədə yer alan idmançılar növbəti mərhələyə adlayıblar. Növbəti mərhələyə yüksələn idmançılar arasında Belarus təmsilçiləri, “Tokio-2020” Yay Olimpiya Oyunlarının qalibi İvan Litvinoviç, beşqat dünya və Avropa çempionu Oleq Ryabtsov, dünya və qitə çempionatlarının mükafatçısı portuqaliyalı Dioqu Abreu, Türkiyə çempionu Gürkan Mutlu, ötən il Bakıda keçirilən 28-ci dünya yaş qrupları yarışının qalibi qazaxıstanlı Roman Barkov və digər idmançılar da var.

İkinci təsnifat mərhələsi fevralın 13-də təşkil olunacaq.

İki gün davam edəcək yarışda 14 ölkədən 63 idmançı iştirak edir.

Dünya kuboku yarışı Azərbaycan Respublikası Nazirlər Kabinetinin xüsusi icazəsi ilə ölkəmizdə tətbiq edilən mövcud karantin qaydalarına və sanitar-epidemioloji tələblərə uyğun olaraq və tamaşaçı iştirakı olmadan keçirilir.

Ənənəyə uyğun olaraq, kubok yarışlarında ən çox icra xalını yığmış gimnasta ənənəvi “AGF Trophy” kuboku təqdim olunacaq.