“Tələbə baharı” tələbələrin XV ümumrespublika bədii yaradıcılıq festivalının qaliblərinin iyunun 23-də Azərbaycan Dövlət Bədən Tərbiyəsi və İdman Akademiyasında (ADBTİA) mükafatlandırılması mərasimi keçirilib.

AZƏRTAC xəbər verir ki, tədbirdə gənclər və idman nazirinin müavini İntiqam Babayev, ADBTİA-nın rektoru Fuad Hacıyev, Azərbaycan Tələbə Gənclər Təşkilatları İttifaqının (ATGTİ) idarə heyətinin sədri Pərviz Mirələmli, Milli Məclisin deputatları və digər şəxslər iştirak ediblər.

Nazir müavini İntiqam Babayev tədbirdə çıxış edərək “Tələbə baharı” XV ümumrespublika bədii yaradıcılıq festivalının Azərbaycan Tələbə Gənclər Təşkilatları İttifaqı ilə birgə hər il təşkil edildiyini bildirib. İ.Babayev bildirib ki, Gənclər “Tələbə baharı” bədii yaradıcılıq festivalına böyük maraq göstərirlər. Festivalın təşkilində əsas məqsəd gənclərin yaradıcılıq potensialını üzə çıxarmaq, onların ictimai həyatda daha fəal iştirakını təmin etməkdir. Prezident İlham Əliyevin Sərəncamı ilə 2021-ci ilin Azərbaycanda “Nizami Gəncəvi İli” elan edilməsi ilə əlaqədar builki festivalın mövzusu Nizami Gəncəvi yaradıcılığıdır.

Akademiyanın rektoru Fuad Hacıyev ADBTİA-nın son illər gənclərin hərtərəfli inkişafı, onların bilik və bacarıqlarının artırılması istiqamətində görülən işlərdən danışıb. “Tələbə baharı" festivalının gənclərin yaradıcılıq potensialının üzə çıxarılmasında əhəmiyyətini qeyd edən F.Hacıyev festivalın qalibləri arasında Akademiyanın tələbələrinin də yer aldığını vurğulayıb.

ATGTİ-nin idarə heyətinin sədri Pərviz Mirələmli “Tələbə baharı” ümumrespublika bədii yaradıcılıq festivalının hər il müxtəlif mövzulara həsr edildiyini, gənclərin bu tədbirdə böyük həvəslə iştirak etdiklərini bildirib. Tədbirin auditoriyasının ildən-ilə genişləndiyini vurğulayan P.Mirələmli “Tələbə baharı”nın qaliblərinin beynəlxalq festivallarda ölkəmizi layiqincə təmsil etdiklərini diqqətə çatdırıb.

Sonda “Tələbə baharı” tələbələrin XV ümumrespublika bədii yaradıcılıq festivalının qalibləri mükafatlandırılıblar.