"Sumqayıt" klubunun prezidenti Riad Rəfiyev ilə ilk görüşümüz Belqradda baş tutdu. Mənə klubun gələcək hədəflərindən danışdı. Bundan sonra Sumqayıta gələrək müqaviləyə imza atdım.

AZƏRTAC xəbər verir ki, bu sözləri “Sumqayıt”ın yeni baş məşqçisi Saşa İliç mətbuat konfransında deyib.

47 yaşlı mütəxəssis Azərbaycanda oynayan bəzi monteneqrolu və serbiyalı futbolçulardan çempionat barədə məlumat aldığını bildirib: "Onlar mənə müəyyən informasiyalar verdilər. "Sumqayıt"ın infrastrukturu məni qane etdi. Ortada 1 illik müqavilə var. Bu müddət ərzində yaxşı komanda qurmaq istəyirəm. Bundan sonra yeni anlaşma ola bilər. Bilirəm ki, "Sumqayıt" üçün ötən mövsüm qeyri-stabil keçib. Yeni mövsümdəki hədəfimiz avrokuboklara vəsiqə qazanmaqdır. Amma futbolçulardan da çox şey asılı olacaq".

Serbiyalı çalışdırıcı yaxşı kollektiv formalaşdırmaq üçün əllərindən gələni edəcəklərini söyləyib: "Hazırda komandada 16-17 futbolçu var. Rəhbərliklə əl-ələ verib, tez bir zamanda yaxşı heyət qurmaq istəyirik".

S. İliç baş məşqçisi olduğu əvvəlki komandalarda 1 ildən artıq işləməməsinə də toxunub: “Rusiyanın "Pari NN" klubunda çalışarkən rəhbərlik qarşıma komandanı liqada saxlamağı hədəf kimi qoymuşdu. Məqsədimizə çatdıq. Yunanıstan karyeram da pis alınmadı. Bolqarıstanın MOİK kollektivi ilə yaxşı mövsüm keçirdik. Liderlə xal fərqimiz az idi. Ümumiyyətlə, müasir futbolda bir komandada bir mövsümdən artıq qalmaq çox çətindir".