Dekabrın 24-də Bakı Slavyan Universitetində “Yaşıl dünya naminə həmrəylik ili” çərçivəsində “Sosial elmlərdə inklüzivlik və dayanıqlı inkişaf məsələləri” mövzusunda beynəlxalq elmi konfrans keçirilib.

AZƏRTAC xəbər verir ki, tədbir inklüziv təhsil və dayanıqlı inkişaf sahəsində elmi müzakirələr aparmaq və beynəlxalq təcrübəni paylaşmaq məqsədilə təşkil olunub.

Konfransın açılışında BSU-nun rektoru Anar Nağıyev, Sumqayıt Dövlət Universitetinin (SDU) rektoru Rüfət Əzizov, Elm və Təhsil Nazirliyinin müşaviri Nicat Məmmədli, Təhsilin İnkişafı Fondunun İdarə Heyətinin sədri Elnur Nəsibov və Türkiyə Ali Təhsil Şurasının sədr müavini Haşim Koç çıxış ediblər.

Konfransda iki əsas mövzu müzakirə olunub.

“Müəllim hazırlığında inklüzivliyin təmin olunması yolları” mövzusunu BSU-nun Pedaqogika və psixologiya kafedrasının müdiri professor Piralı Əliyevin rəhbərliyi ilə Ülviyyə Mikayılova (ADA Universiteti), Yücel Gelişli (Qazi Universiteti), Ülkər Babayeva (Azərbaycan İdman Akademiyası) və digər ekspertlər müzakirə ediblər.

“Beynəlxalq universitet reytinqlərində dayanıqlı inkişaf məsələləri” mövzusunda müzakirələrdə isə Bakı Mühəndislik Universitetinin nümayəndəsi Sevil İmanova moderatorluq edib.

Spikerlər arasında Könül Abbaslı (SDU), Ülviyyə Məmmədova (BSU) və Aliyə Aldunqarova (Şərqi Qazaxıstan Texniki Universiteti) yer alıb.

Konfrans inklüziv təhsilin inkişafı və dayanıqlı inkişaf mövzularında beynəlxalq əməkdaşlığı gücləndirmək baxımından mühüm əhəmiyyətə malikdir.