Yanvarın 16-da Azərbaycan Milli İncəsənət Muzeyində “Qız Qalası. Qadın olmaq” adlı Beynəlxalq Müasir İncəsənət Layihəsi çərçivəsində veb-saytın təqdimatı keçirilib.
×
Yanvarın 16-da Azərbaycan Milli İncəsənət Muzeyində “Qız Qalası. Qadın olmaq” adlı Beynəlxalq Müasir İncəsənət Layihəsi çərçivəsində veb-saytın təqdimatı keçirilib.
AZƏRTAC xəbər verir ki, tədbirdə Azərbaycan Milli İncəsənət Muzeyinin direktoru Şirin Məlikova layihə barədə məlumat verib. O, qadının cəmiyyətdəki rolunun ictimaiyyətə çatdırılmasında və gender bərabərliyinin bərqərar olmasında belə tədbirlərin əhəmiyyətini vurğulayıb. Muzeyin direktoru qeyd edib ki, sözügedən layihədə Azərbaycanın tanınmış, yaradıcı qadınlarının cəmiyyətdə rolu və bu mövzuda digər məsələlər incəsənət vasitəsilə maraqlı formada nümayiş olunur.
Latviya Respublikasının ölkəmizdəki səfiri Edqars Skuyan “Qadınlar sülh uğrunda”, “Gender bərabərliyi” və “Qadınlara və qızlara qarşı zorakılığa son qoyaq” kimi mövzulara həsr edilmiş layihənin proqramına təqdimatlar, film nümayişləri, konsertlər, tamaşalar, sərgilər, panel müzakirələr və konfranslar daxil olduğunu söyləyib.
“Layihə çərçivəsində 2020, 2021 və 2023-cü illərdə ümumilikdə 50 tədbir həyata keçirilib. Layihənin əsas aparıcı tərəfdaşı Latviya səfirliyidir”, - deyə səfir əlavə edib.
BMT-nin Azərbaycandakı rezident-əlaqələndiricisi Vladanka Andreyeva layihədə yer alan hər bir elementin incəsənət və mədəniyyət vasitəsilə sosial inteqrasiyanın təşviqinin və gücləndirilməsinin yeni strategiyada mühüm rol oynamağa istiqamətləndirildiyini diqqətə çatdırıb.