Bu il Sosial Xidmətlər Agentliyinin Bakı şəhəri üzrə filiallarının əsasında vahid regional filialın və sağlamlıq imkanları məhdud uşaqlar və ailələrlə bağlı 5 ixtisaslaşmış mərkəzin, baxımsız uşaqların ailələri ilə profilaktik iş üzrə mərkəzin, məişət zorakılığından əziyyət çəkən şəxslər üçün pilot olaraq böhran mərkəzinin və müəssisəyə düşmənin qarşısının alınması və reinteqrasiya fəaliyyəti üzrə mərkəzlərin yaradılması nəzərdə tutulur. Həmçinin Bakı şəhərində və Ağcabədi rayonunda yeni sığınacaqların açılması, Baxımsız, kimsəsiz və sosial təhlükəli vəziyyətdə olan yetkinlik yaşına çatmayanların sosial reabilitasiyası üzrə Füzuli rayonunda, Əlilliyi olan şəxslər üçün Peşə-əmək reabilitasiya Mərkəzinin Xaçmaz rayonunda filiallarının yaradılması, Abşeron rayonunda yaradılmış Sosial Xidmət Mərkəzi modelinin 3 rayonda yaradılması da bu il qarşıda duran əsas hədəflərdəndir.

AZƏRTAC xəbər verir ki, bu barədə Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin İdarə Heyətinin sədri Vüqar Behbudovun ötən ilin yekunları və bu il qarşıda duran hədəflərə həsr olunan mətbuat konfransında deyib.

O, mətbuat konfransında bu il görülməli peşə-əmək və sosial reabilitasiya tədbirləri barədə ətraflı məlumat verib, Sosial Xidmət Mərkəzinin fəaliyyəti sahələrindən də bəhs edib. Agentliyin İdarə Heyətinin sədri bildirib ki, hazırda mərkəzin xidmətinə 40-a yaxın sağlamlıq imkanları məhdud uşaq cəlb edilib, gündəlik proqrama uyğun olaraq onlara fərdi və qrup məşğələləri keçirilir.

Bu gündən “Qayğı” Çağrı Mərkəzi fəaliyyətə başlayıb. Vüqar Behbudov deyib: “Qayğı” Çağrı Mərkəzi agentliyin təqdim etdiyi sosial xidmətlər, o cümlədən məişət zorakılığı halları və çətin həyat şəraitində olan uşaqlarla, habelə onlayn psixoloji dəstəyin göstərilməsi ilə əlaqədar müraciətlərin cavablandırıldığı qaynar xətdir. Bu gündən başlayaraq hər kəs 116-123 qısa nömrəsinə zəng edərək göstərilən xidmətlər barədə məlumat ala və yararlana bilər”. O, mərkəzə ilk zəng edib, fəaliyyətə başlamaları münasibətilə əməkdaşları təbrik edib, mərkəzin fəaliyyəti ilə bağlı slayd nümayiş olunub.