×
Martın 9-da Təhsil Nazirliyi Respublika Uşaq-Gənclər İnkişaf Mərkəzi tərəfindən “İçərişəhər” Dövlət-Tarix Memarlıq Qoruğu İdarəsilə birgə “Qarabağın musiqi tarixi – aşıq sənəti” gənc aşıqlar onlayn respublika müsabiqəsinin qaliblərinin mükafatlandırılma mərasimi keçirilib.
AZƏRTAC xəbər verir ki, tədbirdə Təhsil Nazirliyi Respublika Uşaq-Gənclər İnkişaf Mərkəzinin direktoru Firuzə Sultanzadə, Əməkdar mədəniyyət işçisi, İçərişəhər Muzey Mərkəzinin direktoru Əminə Məlikova, Aşıqlar Birliyinin katibi, Əməkdar mədəniyyət işçisi Musa Nəbioğlu və Əməkdar incəsənət xadimi, UNESCO-nun qeyri-maddi irs üzrə eksperti Sənubər Bağırova çıxış ediblər.
Müsabiqənin münsiflər heyətində Azərbaycan Dövlət Mədəniyyət və İncəsənət Universitetinin dosentləri, sənətşünaslıq üzrə fəlsəfə doktorları Əhliman Rəhimov, Fəzail Orucov, Əməkdar artist, Azərbaycan Milli Konservatoriyasının müəllimi Kamran Kərimov, Şuşa Humanitar Kollecinin müəllimi Məharət Şərifli təmsil olunub.
Münsiflər heyəti tərəfindən qaliblər müəyyənləşdirilib, müsabiqənin nəticələrinə əsasən, Murad Babaşov (Bakı) “Ustad sənətkar Aşıq Ələsgərin 200 illik yubileyinə həsr olunmuş xüsusi mükafat” nominasiyası üzrə mükafata, 9-11 yaş qrupu üzrə Bahadur Nəhmətli (Qobustan) I yerə, Kənan Cəfərli (Qubadlı) II yerə, Sona Abbasova (Bakı) və Fuad Məmmədov (Ağstafa) isə III yerə, 12-14 yaş qrupu üzrə Pərvin Məmmədli (Bakı) I yerə, Həsən Aşurov (Bakı) və Şahin Qaraşlı (Ağdam) II yerə, Abbas Bəkirov (Mingəçevir), Elmir Şixəliyev (Qaradağ), Tunar Məmmədli (Laçın) III yerə, 15-17 yaş qrupu üzrə Vahid Qurbanlı (Ağstafa) I yerə, Kənan Gülməmmədov (Bakı), Tacir Alxasov (Bakı) II yerə, Anar Əhmədov (Şuşa), İlkin Məmmədov (Kəlbəcər), İbrahim Hüseynov (Ağstafa) III yerə, 18-20 yaş qrupu üzrə Ayşə Məmmədova (Bakı) I yerə, Aynəttin Alışov (Bakı) II yerə layiq görülüb.
Müsabiqənin qalibləri Təhsil Nazirliyi Respublika Uşaq-Gənclər İnkişaf Mərkəzi və “İçərişəhər” Dövlət Tarix-Memarlıq Qoruğu İdarəsi tərəfindən diplom və dəyərli hədiyyələrlə mükafatlandırılıb, bütün iştirakçılara sertifikatlar təqdim olunub.
Qeyd edək ki, 4 yaş qrupu (9-20 yaş) və 3 nominasiya (Qarabağa aid müxtəlif xarakterli aşıq havaları, gözəlləmə, müxəmməs) üzrə keçirilən müsabiqədə 200 nəfər iştirak edib. 2020-ci ilin noyabr-dekabr aylarında müsabiqənin birinci, 2021-ci il yanvar-mart aylarında isə ll turu keçirilib.
Azərbaycan Respublikasının Prezidenti İlham Əliyevin “Aşıq Ələsgərin 200 illik yubileyinin qeyd edilməsi haqqında” Sərəncamından irəli gələn vəzifələrin icrası ilə əlaqədar olaraq, onlayn respublika müsabiqəsi çərçivəsində martın 3-5-də peşəkar müəllimlər tərəfindən aşıq sənəti üzrə onlayn ustad dərsləri təşkil edilib və “Ustad sənətkar Aşıq Ələsgərin 200 illik yubileyinə həsr olunmuş xüsusi mükafat” nominasiyası üzrə mükafatlandırma mərasimi keçirilib.
Müsabiqənin və ustad dərslərinin keçirilməsində əsas məqsəd aşıq sənəti ənənələrinə ən yüksək bədii-estetik meyarlarla yeni məzmun qazandırmış, xalq ruhunda yaratdığı əsərləri ilə Azərbaycanın mədəni sərvətlər xəzinəsinə misilsiz töhfələr bəxş etmiş qüdrətli söz ustadı Aşıq Ələsgər sənətinin təbliğidir. Eyni zamanda, qədim və müasir el havalarının öyrənilməsi, qorunması, uşaq və gənclərin peşəkarlıq səviyyəsinin yüksəldilməsi, bu işin ölkənin regionlarında daha da canlandırılmasının təmin edilməsinə dəstək verilməsidir.