44 günlük Vətən müharibəsində Ordumuzun şanlı qələbəsindən sonra “Qarabağa dönüş” təşkilatı qazi və müharibə iştirakçılarının, o cümlədən şəhid ailələrinin məşğulluq problemlərinin həlli məsələsinə töhfə vermək üçün “Qarabağımızı birlikdə quraq” layihəsi çərçivəsində 25 qazi və müharibə iştirakçısını peşə təhsilinə cəlb edib. Peşə təhsilini başa vuran 25 nəfər qazi və müharibə iştirakçısına sertifikatların təqdim edilməsi üçün tədbir keçirilib.

AZƏRTAC xəbər verir ki, tədbir canlarını Azərbaycanın ərazi bütövlüyü uğrunda qurban vermiş Vətən müharibəsi şəhidlərinin əziz xatirəsinin bir dəqiqəlik sükutla yad edilməsi ilə başlayıb.

Sonra çıxış edən Milli Məclisin deputatları Tural Gəncəliyev, Sevil Mikayılova, Ramin Məmmədov, Emin Hacıyev tədbir iştirakçılarını salamlayıblar. Layihənin önəmi və məqsədi barədə öz fikirlərini bölüşüblər. Peşə təhsilini başa vuran 25 nəfər qazi və müharibə iştirakçısına gələcək fəaliyyətlərində uğurlar arzulayıblar.

Çıxış edən "Ekvita" şirkətinin təsisçisi və direktoru İlqar Mehdi qazilərin peşə təhsilinə cəlb olunması istiqamətində fəal işlərin görülməsinin vacibliyini vurğulayıb. Qeyd edib ki, digər şirkətlər də bu işdə birgə fəaliyyət göstərməlidir.

Kulane Peşə Təhsil Mərkəzinin təsisçisi Emin Ağayev karyera yüksəlişi barədə öz təcrübələrini tədbir iştirakçıları ilə bölüşüb. Peşə təhsilinin önəmi barədə məlumat verib. Layihəni başa vuran iştirakçılara uğurlar arzulayıb.

Sonra Vətən müharibəsi qaziləri də lahiyə barədə öz fikirlərini bölüşüblər. Peşə təhsilinin onların gələcək həyatlarında uğurlu olacağını vurğulayıblar, layihə təşkilatçılarına öz təşəkkürlərini bildiriblər.

Sonda layihəni bitirən 25 qazi və müharibə iştirakçısına beynəlxalq sertifikatlar təqdim olunub.

Qeyd edək ki, 25 qazi və müharibə iştirakçısı BP-Azərbaycan və "Ekvita" şirkətlərinin maliyyə dəstəyi ilə Kulane Peşə Təhsil Mərkəzində kurslara cəlb olunublar. 6 ay ərzində qazi və müharibə iştirakçıları sözügedən mərkəzdə sağlamlıq, əməyin təhlükəsizliyi və ətraf mühit, həmçinin yükqaldırma üzrə mütəxəssis peşələrinin sirrlərini öyrəniblər. Bundan başqa, onlara ingilis dili, psixologiya, etik davranış qaydaları da tədris olunub.