Ölkənin aparıcı korporativ bankı “PAŞA Bank”, Korporativ Sosial Məsuliyyət strategiyası çərçivəsində yeni layihəyə başlayıb. “PAŞA Bank ilə başla” adlanan layihə vasitəsilə bank, əlilliyi olan şəxslərin peşəkar inkişafına, bilik və bacarıqlarının artırılmasına, o cümlədən cəmiyyətə inteqrasiyasına və işlə təmin edilməsinə dəstək verməyi qarşıya məqsəd qoyub. Layihənin təşkilati dəstəkçisi qismində Əmək və Əhalinin Sosial Müdafiəsi Nazirliyi və ADA Universiteti çıxış edir.

AZƏRTAC xəbər verir ki, iyunun 17-də ADA Universitetində layihənin təqdimat mərasimi keçirilib.

Mərasimdə çıxış edən “PAŞA Bank”ın İdarə Heyətinin sədri Taleh Kazımov layihənin əsas hədəflərindən birinin əlilliyi olan şəxslər üçün daha əlverişli imkanların yaradılması olduğunu söyləyib. O, əlilliyi olan şəxsləri öz qüvvələrinə, bilik və bacarıqlarına inanmağa və bu layihədə iştirak etməyə çağırıb.

Qeyd edilib ki, “PAŞA Bank ilə başla” layihəsi bir neçə mərhələdən ibarət olacaq. İlkin mərhələdə müraciətlərin qəbulu və müvafiq namizədlərin seçilməsi, növbəti mərhələdə mütəxəssislər tərəfindən seçilmiş mövzular və sahələr üzrə təlimlərin keçirilməsi nəzərdə tutulub. Layihənin sonuncu mərhələsində isə iştirakçıların işlə təmin olunmasına yardım göstəriləcək. İlk üç ay ərzində həmin mərhələləri keçən 100 nəfərə layihə çərçivəsində dəstək göstəriləcək.

Əmək və Əhalinin Sosial Müdafiəsi Nazirinin müavini Hidayət Abdullayev əlilliyi olan şəxslərin məşğulluğunun artırılması və cəmiyyətə inteqrasiyasının ölkədə aparılan sosial siyasətin prioritetlərindən olduğunu bildirib. Nazir müavini həmin kateqoriyadan olan şəxslərin peşə-əmək reabilitasiyası, əmək bazarına, kiçik biznesə çıxış imkanlarına malik olmaları məqsədilə bir sıra layihələrin icra olunduğunu qeyd edib. H.Abdullayev “PAŞA Bank ilə başla” layihəsinin də bu sahədə işlərə mühüm dəstək olacağını bildirib və belə layihələrin əhəmiyyətini diqqətə çatdırıb.

Layihə çərçivəsində nəzərdə tutulan təlimlərinin keçiriləcəyi ADA Universitetinin prorektoru Fariz İsmayılzadə çıxışı zamanı universitetdə əlliyi olan şəxslərin rahatlığı üçün bütün imkanların təmin olunduğunu və layihədə tərəfdaş qismində iştirak etməkdən məmnunluq duyduğunu qeyd edib.

Azərbaycan Milli Paralimpiya Komitəsinin vitse-prezidenti İlham Zəkiyev çıxış edərək layihənin üstünlüklərindən bəhs edib və ona qoşulanlara uğurlar arzulayıb.

Təqdimat mərasimində Əmək və Əhalinin Sosial Müdafiəsi Nazirliyi, “PAŞA Bank” ASC və ADA Universiteti arasında əməkdaşlıq haqqında Anlaşma Memorandumu da imzalanıb.

Layihədə iştirak etmək istəyən şəxslər https://pashabankilebashla.az/form/ keçidə daxil olmaqla və müvafiq sorğu blankını doldurmaqla qeydiyyatdan keçə bilərlər. Layihəyə qeydiyyat iyulun 31-dək aparılacaq.