Milli Azərbaycan Tarixi Muzeyində “Ömər Faiq Nemanzadə” fotoalbomunun təqdimat mərasimi keçirilib.

AZƏRTAC xəbər verir ki, tanınmış alimlərin, ictimaiyyət nümayəndələrinin iştirak etdikləri tədbirdə çıxış edən Tarix Muzeyinin baş direktoru akademik Nailə Vəlixanlı Azərbaycanın və türk dünyasının ictimai-siyasi fikir tarixində, publisistikasında silinməz iz qoymuş, böyük maarifçi və ictimai xadim Ömər Faiq Nemanzadə irsinin tədqiqi və təbliğinin əhəmiyyətindən danışıb. Böyük maarifçiyə həsr edilmiş fotoalbom haqqında məlumat verən N.Vəlixanlı həmin fotoalboma daxil edilmiş fotoşəkillərin xüsusi maraq doğurduğunu deyib.

Fotoalbom Prezident İlham Əliyevin görkəmli ictimai xadim Ömər Faiq Nemanzadənin anadan olmasının 150 iliyinin qeyd edilməsi haqqında Sərəncamından irəli gələn vəzifələrin icrası çərçivəsində hazırlanıb.

Qeyd olunub ki, muzeyin icraçı direktoru Fərhad Cabbarovun və Ö.F.Nemanzadənin nəticəsi Ülviyyə Pepinovanın tərtibçisi olduğu fotoalboma böyük maarifçinin varisləri tərəfindən muzeyə hədiyyə olunmuş nadir fotoşəkillər, həmçinin vaxtilə muzey əməkdaşları tərəfindən toplanan digər materiallar daxil edilib.

Muzeyin icraçı direktoru Fərhad Cabbarov görkəmli maarifçi Ömər Faiqin geniş ictimai fəaliyyətindən bəhs edib.

Ö.F.Nemanzadənin nəvəsi Fuad Pepinov tədbirin təşkilatçılarına və iştirakçılarına təşəkkürünü bildirib.

Sonda tədbir iştirakçıları “Ömər Faiq Nemanzadə” fotoalbomu ilə tanış olublar