Qida Təhlükəsizliyi Agentliyinin tabeliyində fəaliyyət göstərən Qida Təhlükəsizliyi İnstitutu tərəfindən UNICEF-in dəstəyi və Təhsil Nazirliyinin iştirakı ilə “Məktəblilərin qida bələdçiləri” pilot layihəsinə başlanılıb.

AZƏRTAC xəbər verir ki, Qida Təhlükəsizliyi Agentliyi, UNICEF və Təhsil Nazirliyinin məsul əməkdaşlarının iştirak etdiyi brifinqdə layihənin məqsədi və həyata keçirilmə metodikası haqqında ətraflı məlumat verilib.

Qida Təhlükəsizliyi Agentliyinin İnformasiya təminatı və innovativ həllər şöbəsinin müdiri Mansur Piriyev, BMT-nin Uşaq Fondunun (UNICEF) ölkəmizdəki nümayəndəliyində Səhiyyə və qidalanma proqramının rəhbəri Töhfə Cəmilova və Təhsil Nazirliyi Ümumi təhsilin təşkili və idarəolunması sektorunun müdiri Fuad Qarayev çıxış edərək layihənin məqsədi, onun aparılma proseduru və gənc nəslin, xüsusilə şagirdlərin qida təhlükəsizliyi, sağlam qidalanması sahəsində müsbət rol oynayacağı, eyni zamanda onların maarifləndirilməsinə xidmət edəcəyini bildiriblər.

Qeyd edilib ki, "Məktəblinin dostu” layihəsinin iştirakçıları üçün (ilkin mərhələdə 30 nəfər) 12 mövzudan ibarət seminar onlayn formada Qida Təhlükəsizliyi İnstitutunun mütəxəssisləri tərəfindən tədris olunacaq. Əsasən 5-9-cu sinif şagirdləri arasında hərəsi 90 dəqiqə olmaqla aparılan seminar mövzuları qida təhlükəsizliyi, yeni növ koronavirusun (COVID-19) profilaktikasına dair metodiki göstərişlər, sağlam qidalanmaya dair bilik və bacarıqlar, həmçinin ümumtəhsil müəssisələrində fəaliyyət göstərən bufet və yeməkxanalara nəzarət mexanizmləri nəzərə alınaraq hazırlanıb. Seminarlar yekunlaşdıqdan sonra keçiriləcək imtahanı uğurla başa vuran iştirakçılar “Məktəblilərin qida bələdçiləri” nişanı ilə təltif olunacaq. Bu nişan sayəsində həmin şəxslər fəaliyyət göstərdikləri məktəblərdə bufetlərin fəaliyyəti, həmçinin tərəflərin qida təhlükəsizliyi və sanitar qaydalara hansı formada əməl olunmasına ictimai nəzarəti həyata keçirəcək. Eyni zamanda, təmsil etdikləri məktəblərdə bufetlər, sanitar qovşaq və digər ümumi istifadə olunan ərazilərə maarifləndirici məlumat banerləri yerləşdiriləcək, məktəblilər paylanması üçün çap materialları ilə təmin olunacaq.

Xatırladaq ki, pilot layihə “Azərbaycan Respublikasında qida təhlükəsizliyinin təmin edilməsinə dair 2019-2025-ci illər üçün nəzərdə tutulmuş Dövlət Proqramı” və UNICEF-in Azərbaycanda 2021-2022-ci illər üçün Səhiyyə və Qidalanma Proqramının icrası ilə əlaqədar olaraq, əhalinin həyat və sağlamlığının qorunması üçün qida təhlükəsizliyinin daha səmərəli təşkilinin təmin edilməsi istiqamətində maarifləndirilmə işlərinin genişləndirilməsi və daha da təkmilləşdirilməsi məqsədilə keçirilir. Ümumilikdə üç mərhələdə nəzərdə tutulan layihə çərçivəsində təlim mövzularının tədrisi yekunlaşdıqdan sonra məktəblilər arasında sorğular keçirilərək layihənin nəticələrinin təhlili və geniş tətbiqinə dair təkliflərin verilməsi nəzərdə tutulur.