“Landau” məktəbinin şagirdləri Azərbaycan Dövlət İnformasiya Agentliyinin (AZƏRTAC) qonağı olublar.

Əvvəlcə məktəblilərə AZƏRTAC-ın müxtəlif dövrlərdə istifadə etdiyi texniki avadanlıqların nümunələrindən ibarət muzeyi barədə məlumat verilib.

Balaca qonaqlar Ümummilli Lider Heydər Əliyevin, Prezident İlham Əliyevin və birinci xanım Mehriban Əliyevanın mətbuatla bağlı tədbirlərdə iştirakını, yerli və xarici mediaa müsahibələrini, Müzəffər Ali Baş Komandanın İkinci Qarabağ müharibəsi dövründə xalqa müraciətlərini, işğaldan azad olunmuş bölgələrə səfərlərini əks etdirən fotostendlərlə, həmçinin AZƏRTAC-ın muzeyi ilə tanış olublar.

Sonra şagirdlərə informasiyanın hazırlanması və redaktə olunması barədə məlumatlar verilib. Məktəblilər agentliyin xəbər redaksiyalarına gedib, əməkdaşların iş prosesi ilə tanış olublar.

Qonaqlara agentliyin Uşaq Bilik Portalı haqqında məlumat verilib. Agentlik tərəfindən onlar üçün yaradılan portalda müxtəlif cizgi filmləri, nağıllar, təbiət haqqında məlumatlar, tapmacalar və digər maraqlı materialların yerləşdirildiyi bildirilib.

Sonda uşaqların sualları cavablandırılıb, diplomlar təqdim olunub.