“İRS” (“Naslediye”) seriyası çərçivəsində “Tükənməz xəzinə” və “Azərbaycan: yeni era” adlı yeni kitabların təqdimatı olub. Hər iki nəşr Azərbaycan Respublikası Mədəniyyət Nazirliyinin və “PAŞA Həyat” ASC-nin dəstəyi ilə çap edilib.

AZƏRTAC xəbər verir ki, tədbir Azərbaycanın Dövlət Himninin səsləndirilməsi ilə başlayıb.

Təqdimatda çıxış edən “İRS” jurnalının baş redaktoru Musa Mərcanlı bildirib ki, layihə çərçivəsində çap olunan kitabların sayı artıq otuzu keçib. Onun sözlərinə görə, bu nəşrlərin hamısı yüksək poliqrafik keyfiyyəti, məzmunu və dili ilə seçilir və bu da onların Azərbaycanı beynəlxalq arenada layiqincə təmsil etməsinə imkan yaradır.

“Azərbaycan: yeni era” kitabından danışan baş redaktor vurğulayıb ki, nəşrdə ölkəmizin son 25–30 ildə əldə etdiyi nailiyyətlər sistemli şəkildə əks olunub. Kitabda Azərbaycanın bu gün hansı siyasi və iqtisadi reallıqda yaşadığı, müstəqillik illərində ölkədə hansı şəraitin formalaşdığı ətraflı göstərilir.

Baş redaktorun sözlərinə görə, kitabın məqsədi son otuz ildə Azərbaycanda baş vermiş əsas prosesləri işıqlandırmaqdır: qazanılmış qələbələr, heyrətamiz iqtisadi göstəricilər, mədəniyyət və təhsil sahələrində inkişaf, eləcə də beynəlxalq arenadakı uğurlar. Nəşrdə xüsusi diqqət “Azərbaycan geosiyasi proseslərin mərkəzində” adlı son fəslinə ayrılıb və bu hissə ölkənin artan rolunu rəmzi şəkildə vurğulayır. Əldə olunmuş nəticələr Azərbaycanı bir çox dövlətlər üçün bir növ “maqnitə” çevirib. Belə ki, ölkədə böyük beynəlxalq tədbirlər keçirilir ki, bu da onun daha geniş tanınmasına xidmət edir.

Ayrıca qeyd olunub ki, kitabın əsas bölmələrindən birində Azərbaycan ərazilərinin işğaldan azad olunması və həmin torpaqlarda genişmiqyaslı bərpa və quruculuq işlərinin başlanması haqqında söhbət açılır.

“PAŞA Həyat” ASC-nin İdarə Heyətinin sədri Ülviyyə Cabbarova bildirib ki, bu kimi layihələrin dəstəklənməsi şirkət üçün təkcə böyük qürur mənbəyi deyil, həm də mənəvi məsuliyyətinin vacib bir hissəsidir. Onun sözlərinə görə, belə kitabların nəşrinə dəstək göstərmək və onların işıq üzü görməsinə töhfə verməklə “PAŞA Həyat” Azərbaycanın tarixinə və zəngin keçmişinə hörmət nümayiş etdirir, həmçinin gələcək nəsillər qarşısında mənəvi borcunu yerinə yetirir.

O qeyd edib ki, bu nəşrlərin bir neçə dildə çap olunması xüsusilə əhəmiyyətlidir. Bu, Azərbaycanın tarixini və mədəniyyətini xaricdə təqdim etmək və onu geniş beynəlxalq auditoriyaya çatdırmaq üçün unikal imkan yaradır. Ü.Cabbarova Mədəniyyət Nazirliyinə göstərilən dəstəyə görə dərin minnətdarlığını bildirib, həmçinin “İRS” nəşriyyat evini, rəhbərliyi və bütün kollektivi təbrik edərək onlara mühüm və nəcib fəaliyyətlərində uğurlar arzulayıb.