İslam Əməkdaşlıq Gənclər Forumu Avrasiya Regional Mərkəzinin (İƏGF-ARM) təşəbbüsü ilə 11 ildir uğurla həyata keçirilən “İslam Əməkdaşlıq Təşkilatı (İƏT) Modeli-Beynəlxalq Münasibətlər Akademiyası” layihəsinin 2022-ci il mərhələsinin bağlanış və qaliblərin təltif edilməsi mərasimi keçirilib.

AZƏRTAC xəbər verir ki, dövlət qurumlarının nümayəndələrinin, Milli Məclisin deputatlarının, eləcə də İƏT ölkələri səfirliklərinin, KİV-lərin və QHT nümayəndələrinin iştirakı ilə keçirilən tədbirin əvvəlində İƏT Modelinin fəaliyyəti ilə bağlı videoçarx nümayiş etdirilib.

İƏT Gənclər Forumu ARM-nin baş direktor vəzifəsini icra edən Vüsal Qurbanov proqramın əsas məqsədi haqqında məlumat verərək, Azərbaycan gənclərinin liderlik qabiliyyətini artırmaq üçün son illərdə İƏT Modelinə olan marağın artmasından, indiyədək 1000-ə yaxın məzunun olmasından, həmçinin bu il 600-ə yaxın gəncin müraciət etdiyi proqramın 30-dan çox İƏT ölkəsində uğurla həyata keçirilməsindən bəhs edib.

Xarici işlər nazirinin müavini Elnur Məmmədov çıxışında Azərbaycan-İƏT münasibətləri, xüsusilə, bu ilin martında İƏT xarici işlər nazirlərinin 48-ci sessiyasında Azərbaycan xarici siyasətinin əldə etdiyi uğurlardan danışıb və “İƏT Modeli” proqramının milli diplomatik kadrların yetişməsinə töhfəsini verəcəyinə ümid etdiyini bildirərək, bu sahədə İƏT Gənclər Forumu ARM-nin gördüyü işlərə yüksək qiymət verib.

Gənclər və idman nazirinin müavini İndira Hacıyeva çıxışında layihənin tərəfdaşı kimi təmsil etdiyi nazirliyin İƏT Modelinə göstərdiyi dəstəkdən, qeyri-formal təhsilin gənclərin inkişafındakı rolundan bəhs edərək, gələcəkdə nazirliyin “Gənclər siyasəti”ni həyata keçirmək istiqamətində İƏT Gənclər Forumu ARM ilə əməkdaşlıq edəcəyini qeyd edib.

Diplomatik korpus adından danışan Fələstin Dövlətinin Azərbaycandakı səfiri Nəssir Əbdül Kərim “Azərbaycan gəncliyi üçün uğurlu platforma” adlandırdığı bu layihədə artıq illərdir iştirak etməyindən şərəf duyduğunu diqqətə çatdıraraq, simulyasiya oyunlarında müzakirə edilən mövzuların vacibliyini nəzərə çatdırıb, eləcə də gənclərə uğurlar arzulayaraq, onları kreativ ideyalara açıq olmağa çağırıb.

Qeyd etmək lazımdır ki, simulyasiya oyunlarında İƏT məkanında aktual xarakter kəsb edən münaqişələrlə bağlı müzakirələr aparılıb və müvafiq qətnamələr qəbul edilib. İƏT Gənclər Forumu ARM, həmçinin Gənclər və İdman Nazirliyinin birgə təşkilatçılığı, eləcə də Bakı Dövlət Universitetinin dəstəyi ilə həyata keçirilən İƏT Modeli proqramının əsas məqsədləri İƏT məkanında gənclərin beynəlxalq əməkdaşlığının güclənməsinə dəstək vermək, gənclərin və gənclər təşkilatları rəhbərlərinin, həmçinin üzvlərinin diplomatiya, idarəetmə, kommunikasiya sahəsində yeni bilik, eləcə də təcrübə qazanmasına yardım etməkdir. İki ay ərzində keçirilən mühazirələri dinləyən tələbələr, eyni zamanda, bu ölkələrin səfirliklərinə gedərək, həmin ölkələrlə bağlı lazım olan məlumatları əldə ediblər.

Qeyd edək ki, ötən illər ərzində azərbaycanlı tələbələr dəfələrlə ümum-İƏT miqyasını əhatə edən və 40-dan artıq İƏT-ə üzv ölkə nümayəndələrinin iştirak etdiyi “Beynəlxalq İƏT Modeli” yarışmalarında ölkəmizi layiqli şəkildə təmsil ediblər.

Bağlanış mərasiminin sonunda Azərbaycanda akkreditə olunan İƏT səfirlikləri nümayəndələri layihə çərçivəsində keçirilən “İƏT Modeli XİN konfransı” adlanan simulyasiya oyunlarının finalçılarını müvafiq sertifikat və hədiyyələrlə təltif ediblər.