Böyük Azərbaycan şairi, dramaturqu və mütəfəkkiri Hüseyn Cavidin anadan olmasının 140 illiyi münasibətilə “Hüseyn Cavid sənəti: ideallar və müasir dövr” mövzusunda beynəlxalq elmi konfrans keçirilib.
×
Böyük Azərbaycan şairi, dramaturqu və mütəfəkkiri Hüseyn Cavidin anadan olmasının 140 illiyi münasibətilə “Hüseyn Cavid sənəti: ideallar və müasir dövr” mövzusunda beynəlxalq elmi konfrans keçirilib.
AZƏRTAC xəbər verir ki, Azərbaycan Milli Elmlər Akademiyası (AMEA) Ədəbiyyat İnstitutunun və Mədəniyyət Nazirliyinin təşkilatçılığı ilə baş tutan tədbiri AMEA-nın vitse-prezidenti akademik İsa Həbibbəyli açıb. Akademik bildirib ki, H.Cavidin yaratdığı məktəb ədəbiyyatımızı, incəsənətimizi zənginləşdirməkdə davam edir. Onun zəngin irsi bütün türk dünyasının əsəridir. Şairin faciəvi sonluqla bitən ömrü mükəmməl sənət əsərini xatırladır.
Beynəlxalq konfransda çıxış edən mədəniyyət naziri Anar Kərimov H.Cavidin əsərlərinin geniş coğrafiyada yayıldığını deyib. Şairin əsərlərinin dünya miqyasında tamaşalara qoyulduğunu qeyd edən nazir, ədibin nəinki Azərbaycan, bütün türk dünyasının rəğbətini qazandığını bildirib. Cavidin türk dünyasının mütəfəkkiri adına layiq görüldüyünü deyən Anar Kərimov ədibin Azərbaycan mədəniyyətinə, ədəbiyyatına verdiyi töhfələrə görə Ulu Öndərin onu hər zaman uca tutduğunu xatırladıb.
Azərbaycan Yazıçılar Birliyinin sədri Xalq yazıçısı Anar Rzayev H.Cavidin Azərbaycan teatrının əsasını qoyduğunu və bu sənətin indi də yaşadığını bildirib. Vurğulayıb ki, Cavid sovet dövründə günün nəbzini tutmadığı üçün tənqid edilsə də, əslində əsrin nəbzini tutub. Dramaturqun əsərləri hər zaman aktualdır.
Daha sonra AMEA-nın vitse-prezidenti akademik İsa Həbibbəylinin “Azərbaycan ədəbiyyatının romantik korifeyi Hüseyn Cavid sənəti və əbədiyyəti” mövzusunda məruzəsi dinlənilib.
Konfrans tədbir iştirakçılarının çıxış və müzakirələri ilə davam edib