Noyabrın 2-də Ailə, Qadın və Uşaq Problemləri üzrə Dövlət Komitəsi və Regional İnkişaf İctimai Birliyinin birgə təşkilatçılığı ilə “Güclü cəmiyyətin zərif simaları” layihəsinin yekun konfransı keçirilib.

AZƏRTAC xəbər verir ki, konfrans Dövlət Himninin səsləndirilməsi ilə başlayıb. Daha sonra layihəyə həsr olunmuş film nümayiş etdirilib, həyata keçirilən fəaliyyətlər və əldə olunan nəticələr barədə məlumat verilib.

Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva qızların keyfiyyətli təhsilə, məşğulluğa və inkişaf imkanlarına çıxışının genişləndirilməsinin, eləcə də bu imkanlardan səmərəli istifadə etmələrinə dəstək göstərilməsinin xüsusi əhəmiyyət daşıdığını bildirib.

Regional İnkişaf İctimai Birliyinin Təlim, inkişaf və innovasiya şöbəsinin müdiri Pərvanə Hacıyeva çıxışında layihə çərçivəsində müxtəlif sahələrdə çalışan, peşəkar fəaliyyəti və nailiyyətləri ilə seçilən qadınların iştirakı ilə TEDx formatında görüşlərin təşkil olunduğunu bildirib.

Milli Məclisin Gənclər və İdman Komitəsinin sədr müavini, layihənin eksperti Könül Nurullayeva qadın və dövlət siyasətindən danışarkən Ümummilli Lider Heydər Əliyevin bu sahədəki xidmətlərini xüsusi qeyd edib. O bildirib ki, Ulu Öndər qadınların dövlət idarəçiliyində, ictimai-siyasi fəaliyyətdə, elm və təhsildə, iqtisadiyyatın müxtəlif sahələrində iştirakına, hüquqlarının qorunmasına və potensiallarının üzə çıxarılmasına daim diqqət yetirib.

Könül Nurullayeva bu siyasətin Prezident İlham Əliyev tərəfindən uğurla davam etdirildiyini vurğulayıb.

Qeyd edək ki, 2024-cü ildən həyata keçirilən “Güclü cəmiyyətin zərif simaları” layihəsinin məqsədi qızların və qadınların bilik və bacarıqlarını, liderlik keyfiyyətlərini və özünəinamını inkişaf etdirmək, onların cəmiyyət həyatında fəal iştirakını dəstəkləməkdir.

Layihə çərçivəsində respublikanın müxtəlif şəhər və rayonlarında yaşayan qız və qadınlarla öz sahəsində uğur qazanan qadınların görüşləri təşkil olunub. TEDx formatında keçirilən görüşlərdə ekspertlər həyat və peşəkar təcrübələrini bölüşüb, iştirakçıların suallarını cavablandırıblar.

Konfrans çərçivəsində layihənin ekspertləri mükafatlandırılıb. Tədbir bədii proqramla davam edib.