Azərbaycan Dövlət Film Fondunda “Fərhad – portret cizgiləri” sənədli filmi yenilənmiş versiyada izləyicilərə təqdim edilib.

AZƏRTAC xəbər verir ki, tədbirdə Dövlət Film Fondunun direktoru, Əməkdar incəsənət xadimi Cəmil Quliyev filmlə bağlı fikirlərini bölüşüb, Fərhad Bədəlbəylini öz sənətinə sadiq ziyalı kimi səciyyələndirib.

Diqqətə çatdırılıb ki, SSRİ Xalq artisti, professor, görkəmli musiqi xadimi Fərhad Bədəlbəylinin yaradıcılığına həsr edilmiş film 1987-ci ildə “Azərbaycanfilm” kinostudiyasında istehsal olunub. Filmin rejissoru Cəmil Fərəcov, operatoru Sərdar Vəliyev, ssenari müəllifi Arif Əliyevdir.

Təqdimatın sonunda Xalq artisti, professor, görkəmli musiqi xadimi Fərhad Bədəlbəyli çıxış edərək bu işdə əməyi keçənlərə minnətdarlığını bildirib. Belə sənədli filmlərin digər görkəmli mədəniyyət xadimləri haqqında da çəkilməsini arzulayıb: “Biz gərək XX əsrdə yaşamış dahi şəxslərin həyatını XXI əsrə ötürək. Azərbaycanın ötən əsrdə topladığı zəngin mədəni irsini yeni nəsillərə çatdırmalıyıq”.