İyulun 18-də Bakı Konqres Mərkəzində Azərbaycan Respublikasının Gənclər Fondunun dəstəyi ilə “Enactus Azərbaycan” milli yarışının final mərhələsi start götürüb.

AZƏRTAC xəbər verir ki, yarışın açılış mərasimində əvvəlcə Azərbaycanın Dövlət Himni səsləndirilib və ölkəmizin ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.

Tədbirdə çıxış edən Gənclər Fondunun icraçı direktoru Fərid Cəfərov finala çıxmaq münasibətilə komandaları təbrik edib, onlara uğurlar arzulayıb. “Enactus Azərbaycan” hərəkatı ilə bağlı məlumat verən qurum rəsmisi qeyd edib ki, ölkəmizdə artıq 10 ilə yaxın bir müddətdə fəaliyyət göstərən hərəkat Gənclər Fondu tərəfindən yaxından dəstəklənib: “Sevindirici haldır ki, son 4 ildə gənclər tərəfindən bu hərəkata böyük maraq var. Əgər 4 il əvvəl bu yarışa 6-7 komanda qatılırdısa, son milli çempionatda 21 ali təhsil müəssisəsindən 21 komanda iştirak edir. Məqsədimiz bu hərəkatı orta ixtisas təhsil müəssisələrində də inkişaf etdirməkdir”.

Fərid Cəfərov qeyd edib ki, bu il Azərbaycanda ilk dəfə qlobal sammit keçirilib və tədbirdə 35 ölkədən olan “Enactus”un rəhbərləri iştirak ediblər: “Bu mötəbər tədbirin ölkəmizdə keçirilməsi bu sahədə tələbələrin ideyalarının stimullaşdırılmasına dövlət dəstəyinin bariz nümunəsidir. Prezident İlham Əliyev tərəfindən həyata keçirilən gənclər siyasəti gənclərimizin hərtərəfli yetişməsi, təhsilli və geniş dünyagörüşünə malik olmasına hesablanıb”.

Təhsil nazirinin müavini Muxtar Məmmədov, Naxçıvan Gənclər Fondunun icraçı direktoru, Milli Məclisin deputatı Cəbi Quliyev, Əmək və Əhalinin Sosial Müdafiəsi Nazirliyinin idarə heyətinin sədri Mustafa Abbasbəyli çıxış edərək gənclərimizin ölkənin ictimai-siyasi, sosial-iqtisadi, elmi-mədəni, humanitar həyatında mühüm rola malik olduqlarını vurğulayıblar. Tədbirin önəmindən danışan çıxışçılar yarış iştirakçılarına uğurlar arzulayıblar.

Qeyd edilib ki, müsabiqənin keçirilməsində əsas məqsəd ötən müddət ərzində ən yaxşı layihəni ərsəyə gətirmiş 3 “Enactus” komandasını müəyyən etməkdir. Finalda qalib gələcək komanda oktyabrın 30-dan noyabrın 2-dək Puerto-Rikoda keçiriləcək “Enactus Dünya Kuboku”nda Azərbaycanı təmsil edəcək.

Sonra final yarışına start verilib.

Xatırladaq ki, iyulun 13-də “Enactus Azərbaycan” milli yarışının yarımfinal mərhələsi baş tutub. Münsiflər heyətinin qərarına əsasən, 1-ci liqa üzrə Bakı Dövlət Universiteti və Naxçıvan Dövlət Universiteti, 2-ci liqa üzrə Azərbaycan Dövlət İqtisad Universiteti və Sumqayıt Dövlət Universiteti, 3-cü liqa üzrə isə Bakı Ali Neft Məktəbi və Bakı Mühəndislik Universitetinin “Enactus” komandaları final mərhələsinə vəsiqə qazanıblar.